„Ef við hefðum ekki verið að setja þessi skot þá hefðum við skíttapað“

„Geggjað að vinna en ég held að það hafi ekki verið neitt alltof gaman að horfa á þennan leik þó hann hafi verið jafn. Þetta var mjög skrítinn leikur. Bæði lið áttu mjög slæma kafla sem hitt liðið náði ekki að nýta sér. Mjög sveiflukennt en geggjað að vinna, við tökum það.“

Haukar lentu níu stigum undir um miðjan þriðja leikhluta en svöruðu þá með 13-0 áhlaupi og lögðu þar með grunninn að sigrinum. Emil sagði að á þeim kafla hefði liðið farið að spila eins og það á að spila.

„Við í rauninni förum bara aðeins að láta boltann ganga. Það er aðalmálið. Við vorum rosalega stífar, þetta var bara ein sending og skot. Um leið og það kom sókn þar sem við létum boltann aðeins ganga, sem er svona okkar leikur, kannski ekki þeirra leikur, þær spila kannski hægar.“

„Við vildum hreyfa þær rosa mikið. Ef við skjótum bara einu skoti geta þær bara slakað á í vörn. Það var held ég munurinn. Fórum aðeins að hlaupa, náðum hraðaupphlaupum og láta boltann ganga betur. Sækja á veikleikana þeirra, þá leit þetta miklu betur út.“

Þær Amandine Justine Toi og Tinna Guðrún Alexandersdóttir létu þristunum heldur betur rigna á köflum í kvöld og munaði um minna fyrir Hauka, en þær skoruðu ellefu af 16 þristum liðsins í kvöld. Þær settu á köflum hreinlega upp skotsýningu.

„Sem betur fer! Annars hefði þetta nú verið ennþá verr á að horfa. Við erum gott skotlið, „ef við hefðum ekki verið að setja þessi skot þá hefðum við skíttapað“ þessum leik. Þær eru góðir skotmenn. Ég treysti þeim alveg til að koma og setja þessi skot ofan í. Við vorum opnar eiginlega allan leikinn. Við vorum ekki að fá frábæra vörn á okkur, þær voru svolítið bara að falla inn.“

Eftir rysjótta byrjun á tímabilinu eru Haukar að mjaka sér upp töfluna og fara sáttir í jólafrí.

„Þetta telur á töfluna. Við erum sátt. Erum náttúrulega að berjast fyrir því að komast í efri hlutann þannig að hver einasti sigur skiptir máli fyrir okkur. Þetta er bara góð jólagjöf.“