Afinn tapaði á ögur­stundu

Rivers, sem hætti árið 2020, kom til Indianapolis Colts á miðvikudag enda félagið í mikilli leikstjórnendakrísu. Hann byrjaði svo leikinn gegn sterku liði Seattle Seahawks.

Rivers átti fínasta leik og Colts komst yfir í leiknum er 47 sekúndur lifðu leiks. Vörn Colts náði aftur á móti ekki að standa í lappirnar og Seahawks komst aftur yfir í lokin og vann leikinn. Þessi magnaða Öskubuskusaga fékk næstum því hinn fullkomna endi.

Dallas Cowboys er svo gott sem úr leik í baráttunni um sæti í úrslitakeppninni eftir tap gegn Minnesota Vikings í nótt.

Denver Broncos vann sinn ellefta leik í röð er heitt lið Green Bay Packers kom í heimsókn. Tapið högg fyrir Packers en stærsta höggið kom er varnarmaður liðsins, Micah Parsons, meiddist illa og hann spilar ekki meira í vetur.

Detroit Lions er komið í þrönga stöðu eftir að hafa tapað gegn LA Rams sem er sjóðheitt um þessar mundir. Buffalo Bills vann sömuleiðis frábæran sigur á New England Patriots sem var búið að vinna tíu leiki í röð fyrir leikinn gegn Buffalo.