Ferðamálastofa fellir úr gildi starfs­leyfi Eagle golfferða

Félagið hefur því ekki lengur heimild til að setja saman, bjóða fram eða selja pakkaferðir eða að milligangast sölu samtengdrar ferðatilhögunar í atvinnuskyni. Fjallað var um það í síðustu viku að Jón Marinó Birgisson og Herdís Rós Kjartansdóttir ættu um milljón inni hjá fyrirtækinu vegna golfferðar sem þau komust ekki í þegar Play fór í þrot. 

Þau reyndu að sækja um endurgreiðslu til Ferðatryggingasjóðs en aðeins er hægt að sækja þar um hafi fyrirtæki skilað inn leyfi eða orðið ógjaldfær. Til dæmis geta viðskiptavinir Tango Travel, sem hætti starfsemi eftir fall Play, ekki sótt um í sjóðinn.

Í tilkynningu frá Ferðamálastofu segir að sjóðurinn endurgreiði ferðamanni þær greiðslur sem hann hefur innt af hendi vegna pakkaferðar eða samtengdrar ferðatilhögunar sem ekki er framkvæmd í samræmi við samning vegna ógjaldfærni ferðaskrifstofu.

Þakkar þolinmæði og skilning

Árni Freyr Hallgrímsson, framkvæmdastjóri Eagle golfferða, segir afar miður að staðan sé þessi. Í tilkynningu á Facebook-síðu fyrirtækisins þakkar hann viðskiptavinum fyrir þolinmæði og skilning sem þau hafi sýnt á meðan fyrirtækið vann að því að leysa úr flækjum sem sköpuðust eftir fall Play.

„Ferlið hefur verið bæði umfangsmikið og tímafrekt, og okkur þykir innilega leitt að uppgjör mála hafi dregist svona á langinn. Nú getum við þó loks komið með mikilvægar og jákvæðar fréttir,“ segir hann og að viðskiptavinir geti nú sótt um í Ferðatryggingasjóð.

„Við skiljum vel að þessi staða hefur valdið mörgum vonbrigðum og óvissu. Markmið okkar frá fyrsta degi hefur verið að tryggja rétt farþega og vinna náið með viðeigandi aðilum að því að koma öllum málum í réttan og tryggan farveg. Við erum þakklát fyrir þann skilning og stuðning sem margir hafa sýnt og höldum áfram að vera til staðar fyrir ykkur meðan endanlega er gengið frá öllum málum,“ segir hann að lokum.

Í tilkynningu Ferðamálastofu kemur fram að frestur til að senda sjóðnum kröfu sé til og með 9. febrúar 2026.

„Krafa þarf að berast innan kröfulýsingarfrests. Kröfur sem berast eftir þann tíma eru ekki teknar til greina. Kröfur eru sendar í gegnum vefgátt á island.is,“ segir í tilkynningu Ferðamálastofu.