Hneykslaði marga með því að æfa með barnið á bakinu

CrossFit-stöðin CrossFit Evergreen í Kolaradó-fylki birti myndbandið af umræddri konu gera æfingar í stöðinni með barn á bakinu.

Barnið sat í sérstökum barnastól sem foreldrar nota vanalega í gönguferðum með börnin sín. Þessi kona taldi það góðan kost að nýta sér þennan barnastól einnig í ræktinni.

Myndbandið fór á mikið flug á netmiðlum, með margra milljóna áhorf, og þótti mörgum konan sýna þarna mikið ábyrgðarleysi. Neikvæðar aðfinnslur og skilaboð kölluðu á svar frá stöðinni sjálfri.

Forráðamenn CrossFit Evergreen-stöðvarinnar standa með sinni konu og birtu eftirtalda yfirlýsingu eftir að myndbandið varð svona vinsælt. Þeir bentu líka á það að það hneyklaðist enginn þegar karlmaður gerði hið sama.

„Hér er ekkert annað á ferðinni en manneskja að gera örugga og frábæra æfingu með barnabarninu sínu. Við erum lítil líkamsræktarstöð og barnið var aldrei í neinni hættu,“ skrifaði stöðin á samfélagsmiðla sína.

„Sigrar þessarar konu og margra annarra eins og hennar, og karla líka, eru magnaðir og ætti að fagna þeim en ekki dæma þá eða skjóta þá niður. Við birtum líka myndband af manni að gera það sama án allra neikvæðu athugasemdanna. Okkur er alveg sama um „like“ eða skoðanir ykkar, við dreifum jákvæðum skilaboðum og hvetjandi vinnu til að veita öðrum innblástur,“ skrifaði stöðin

„Saman erum við sterkari, það er einkunnarorð okkar í þessari stöð, með þessu fólki og í samfélaginu okkar. Þið sem skiljið þetta, haldið áfram að sækjast eftir því sem er betra og gott í lífinu. Við erum stolt af ykkur. Ótti og hatur rífa okkur niður. Ást og stuðningur byggja okkur upp. Trysta og þetta englabarnabarn. Já! Þessi amma er að æfa með nýja stuðningsaðilanum sínum. Þar sem er vilji er vegur. Saman erum við sterkari,“ skrifaði CrossFit Evergreen-stöðin eins og sjá má hér fyrir neðan.