Kvöddu húsið og Nablinn klifraði í kveðju­skyni

Það hefur reyndar dregist aðeins að nýja húsið verði opnað og það hafði staðið til að leikur ÍA við Álftanes á föstudaginn yrði spilaður þar en ekki við Vesturgötuna. Skagamenn unnu þar dísætan 76-74 sigur og halda áfram að gera góða hluti sem nýliðar í deildinni.

Nablinn fékk Styrmi Jónasson, leikmann ÍA, í spjall eftir þennan meinta kveðjuleik, í beinni útsendingu í Bónus Körfuboltakvöldi eins og sjá má hér að neðan.

„Við skulduðum þessu húsi að klára þetta svona með sigri. Það var svekkjandi að ná ekki sigri síðast en við náðum honum núna og förum núna í nýtt hús. Það er allt á uppleið hérna,“ sagði Styrmir við Andra.

Andri spurði þá hvort það væri alveg öruggt að um síðasta leikinn hefði verið að ræða. Þetta væri í raun farið að minna á „síðasta Sjallaballið“ sem væri svo sífellt endurtekið.

Segir ekki hægt að finna flottara íþróttahús hér á landi

„Þeir lofa því. Kannski. Kannski ekki,“ sagði Styrmir léttur en hann getur ekki beðið eftir að spila í nýja húsinu:

„Þetta er eins flott íþróttahús og þú getur séð á Íslandi. Tíu af tíu.“

Í húsinu við Vesturgötu er hins vegar klifurveggur sem viss söknuður er að og ákvað Andri að nýta tækifærið til að klifra upp, eins og Skagamenn hafa gert í körfuboltanum undanfarin misseri svo eftir hefur verið tekið:

„Það er geggjaður andi [á Akranesi]. Maður er stoppaður úti á götu og spurður út í körfuboltann. Við erum með geggjaða leikmenn í útlendingunum okkar og það er bara allt geggjað,“ sagði Styrmir eins og sjá má í spilaranum hér að ofan.