Segir ekki honum að kenna að Play hafi farið á hausinn

Í tilkynningu Play til Kauphallar í gærmorgun vegna yfirvofandi gjaldþrots kom fram að flugmiðasala hafi undanfarið gengið illa og vísaði þar til neikvæðrar umfjöllunar um reksturinn í fjölmiðlum. 

Er þá meðal annars verið að vísa til orða Jóns Þórs Þorvaldssonar, formanns Félags íslenskra atvinnuflugmanna, í Bítinu í byrjun september þar sem hann spáði fyrir um endalok Play. 

Play kvartaði í kjölfarið til Samkeppniseftirlitsins vegna meintrar misnotkunar Icelandair á markaðsráðandi stöðu en auk þess að vera formaður stéttarfélagsins er Jón Þór flugstjóri hjá Icelandair.

Orð forstjóra hefðu þá núllað hans orð út

Í viðtalinu í Bítinu á sínum tíma gagnrýndi Jón Þór áform Play um að færa starfsemi félagsins til Möltu. Í kvörtun Play til Samkeppniseftirlitsins var sagt að dylgjur og rangfærslur hafi grafið undan trausti almennings til félagsins. Jón Þór segist gefa lítið fyrir ásakanir Play í kvörtuninni.

„Eigum við ekki bara að skoða hvað gerðist í gær? Það sem ég sagði þá að það væri mín skoðun, eftir að hafa lesið ársreikninga félagsins, að það væri stutt eftir. Ég spurði þar hver myndi borga það og sú spurning stendur,“ segir Jón Þór.

„Ef orð geta haft áhrif hefði það átt að vera núllað út af hálfu forstjóra og segir að þetta hafi allt verið rangfærslur og dylgjur,“ bætir Jón Þór við.

Einar Örn forstjóri Play svaraði Jóni Þór í Bítinu á sínum tíma og sagði hann ganga erinda Icelandair.

Hafnar hagsmunaárekstrum

Jafnframt neitar Jón Þór fyrir að orð hans um Play skapi hagsmunaárekstra fyrir hann, verandi formaður FÍA og starfsmaður Icelandair. Hann segist í gegnum tíðina hafa barist gegn gerviverktöku og undirboðum í flugbransanum. Félagið hafi verið stofnað á röngum forsendum og félagsleg undirboð verið staðreynd. 

Hann hefur áhyggjur af þeim sem störfuðu hjá Play og spyr hvert þeir fjármunir fari sem nýlega hafi verið settir inn í rekstur Play.

„Hvar eru þeir? Væri ekki rétt að nýta þá til að koma því fólki, neytendum, til sinna heima sem höfðu í góðri trú bókað með félaginu? Við hljótum að þurfa að spyrja gagnrýninna spurninga, það er ekki bara því ég sagði þetta þá hafi Play farið á hausinn. Undanfari þessa viðtals var tæplega 30 þúsund milljóna taprekstur á fjórum árum,“ segir Jón Þór.

„Ef við skoðum ársreikninga frá öðrum ársfjórðungi 2025 þá var eigið fé neikvætt og handbært fé rétt um 400 milljónir króna. Svo kemur þessi innspýting á fjármagni. Hvað varð um þá peninga? Áttu þeir ekki að bjarga þessu?“ segir Jón Þór. Örfáum dögum fyrir umtalaða viðtalið í Bítinu hafði Play tryggt sér á þriðja milljarð króna í hlutafjáraukningu.

Jón Þór segir sögu íslensks flugreksturs ekki glæsilega undanfarin ár.

„Þetta skaðar orðspor okkar út á við, Íslendinga í flugrekstri. Ég hef áhyggjur af því.“