Um þögnina varðandi dómaramál KKÍ: „Þurfum að komast til botns í þessu“

Davíð Tómas Tómasson, annar tveggja alþjóðadómara sem Ísland á, tilkynnti Vísi í morgun að hann væri hættur dómgæslu aðeins 36 ára að aldri. Hann geri það ekki að sjálfdáðum heldur hafi hann verið útilokaður frá dómgæsluverkefnum af dómaranefnd sambandsins.

Tilraunir til sátta hafi litlum árangri skilað og hann settur út af sakramenntinu. Hann þakkar það slæmu umhverfi skapað af téðri nefnd sem hafi orsakað það að fleiri hafi hrökklast frá störfum.

Jón Guðmundsson tók í svipaðan streng en honum var vísað frá þegar hann hugðist snúa aftur til starfa sem dómari eftir að hafa reynt fyrir sér í þjálfun.

KKÍ vildi ekki svara fyrir málið þar sem ekki náðist í Jón Bender, formann dómaranefndar sambandsins, og Hannes S. Jónsson, framkvæmdastjóri þess, vildi ekki tjá sig að svo stöddu.

Körfuboltasamfélagið krefst hins vegar svara.

„Mér finnst skrítið að KKÍ og jafnvel dómaranefndin tjái sig ekki um málið eða kýs ekki að tjá sig. Svona mál þarf að tjá sig um. Af hverju þetta endar svona og hinsegin þar sem það er verið að útiloka okkar allra besta dómara úr deildinni og gefa honum ekki verkefni sem er mjög slæmt,“ segir Hermann Hauksson, sérfræðingur í Bónus Körfuboltakvöldi.

„Þetta gerðist líka með Jón Guðmunds sem er frábær dómari. Hann fékk ekki nægilega góð svör frá þessum nefndum og annað slíkt.“

„Það er einhverstaðar brotið þarna inn á milli og við þurfum að komast til botns í þessu, við þurfum að fá almennileg svör. Þetta er slæmt, þarna eru tveir frábærir dómarar sem eru í miklum metum veit ég hjá leikmönnum deildarinnar því þetta eru dómarar sem kunna sitt fag. Mér finnst þetta slæmt fyrir hreyfinguna.“

Hefur Hermann trú á því að það sé hægt að finna lausn og við getum haft alla okkar bestu dómara á gólfinu?

„Ég vil að það verði fundin lausn til að hafa bæði Jón og Dabba T eins og hann er kallaður aftur á gólfið. Við þurfum á því að halda og mér finnst synd að þetta sé svona. Það eru tvær hliðar á öllum málum en ég trúi ekki öðru en þessar hliðar geti sameinast og fundið réttan kjöl á þessu svo við sjáum þá aftur stinga flautunni upp í sig og við í Körfuboltakvöldi getum farið að gagnrýna þá.“