Fannst skila­boðin frá dómaranefnd galin

Í viðtali við Vísi lýsti Davíð Tómas Tómasson, alþjóðadómari í körfubolta, að hann væri hættur að dæma vegna ósættis við dómaranefnd KKÍ.

Davíð sagðist ekki vera eini dómarinn sem hafi verið settur út af sakramentinu hjá dómaranefnd KKÍ og nefndi í því samhengi meðal annars Jón sem var um langt árabil einn fremsti dómari landsins. Hann tók sér hlé frá dómgæslu um tíma en þegar hann ætlaði að snúa aftur kom hann að lokuðum dyrum.

„Ég fékk ekki nein bein svör. Ég kom inn með mikla reynslu og gott orð en mér var sagt að það væru aðrir á þeim stað sem ég var að reyna að komast á. Það var allt og sumt,“ sagði Jón í samtali við Vísi.

Hvað samskiptavanda við dómaranefnd KKÍ varðar segir Jón að hann hafi haft sínar skoðanir á dómaramálunum hér á landi en það hafi þó ekki verið gefin sem skýring fyrir því að hann væri ekki velkominn til baka í dómgæsluna.

„Ég hafði mínar skoðanir á hlutunum og þeir sínar. Þess vegna er kannski talað um samskiptavanda. Þegar ég kom til baka fékk ekkert að heyra að þetta væri samskiptavandi heilt yfir, heldur að nú væri ég að koma til baka eftir hlé og nú væru aðrir á þeim stað sem ég var að reyna að komast á. Það voru þau skilaboð sem ég fékk frá dómaranefnd,“ sagði Jón. Honum fannst ekki mikið til þeirra svara koma.

„Þau eru galin, ef ég á að vera alveg hreinskilinn. Ég vissi alveg hvað ég gat og kunni í þessum fræðum en að geta ekki nýtt mína krafta fannst mér frekar lélegt.“

Varðandi þá dómara sem hafa helst úr lestinni á undanförnum árum kallar Jón eftir svörum frá dómaranefnd.

„Mér finnst að þessi svör verði að koma frá þeim sem stjórna. Þótt ég geti hafa verið erfiður í samskiptum var ég ekkert með stæla og læti allan daginn alla daga. En maður hafði skoðanir á hlutunum og þegar maður varpaði þeim fram fór það misvel í fólk. Ég skil það alveg að menn hafi sitt hvora skoðunina á þessu. En á sínum tíma fannst mér þetta frekar skítt,“ sagði Jón.