Younghoe sparkað burt

Suður-Kóreumaðurinn er þriðji stigahæsti leikmaður í sögu félagsins og var á sínum tíma talinn besti sparkari deildarinnar. Hann hefur verið hjá Atlanta síðan 2019 og sýndi mikinn stöðugleika lengi, en hefur átt erfitt uppdráttar undanfarið.

Eftir slæmt tímabil í fyrra byrjaði Younghoe þetta tímabil á því að klúðra sparki sem hefði jafnað leik Falcons og Tampa Bay Buccaneers.

Younghoe var síðan settur á bekkinn og látinn horfa á þegar Parker Romo skoraði úr fimm af fimm spörkum í sigri Falcons gegn Minnesota Vikings í síðustu umferð.

Romo hefur nú tekið við sem aðalsparkarinn í Atlanta og Younghoe leitar á önnur mið.

Atlanta Falcons mæta Carolina Panthers í þriðju umferð NFL deildarinnar á sunnudag. Fylgst verður með leiknum í NFL RedZone á Sýn Sport 3.