Breskur auð­kýfingur brjálaður og norsku kafararnir of dýrir

Árni sló í gegn eftir síðustu Alþingiskosningar með myndböndum sínum af Uglu Tré og vinkonu hennar Gógó þar sem hann hefur stofnanir og stjórnmálamenn að háði og spotti. Myndböndin hafa notið svo mikilla vinsælda að búið er að bóka hann í uppistand.

Nýjasta myndband Árna er í metnaðarfyllri kantinum miðað við eldra efni en þar birtist óboðin Ugla Tré í vöðlum, með sundgleraugu og háf í heitum potti nágrannakonu sinnar.

„Hvað er í gangi hérna? Hver ert þú eiginlega?“ spyr konan sem heldur á myndavélinni.

„Góða kvöldið, ég heiti Ugla Tré, ég er nágranni þinn og sá að þú varst með heitan pott og ég tók hann svona eignabámi bara tímabundið í kvöld. Ég þarf nefnilega að æfa mig. Ég er að taka að mér ýmis verkefni fyrir ríkisstjórnina og þessir norsku kafarar eru allt of dýrir.“

„Þeir halda að sé að koma eldislax í Selá“

Ugla bendir konunni á að stýrivextir voru ekki lækkaðir vegna alltof mikils kostnaðar hjá ríkinu.

„Þannig að það er verið að þjálfa mig upp. Þeir halda að sé að koma eldislax í Selá við Vopnafjörð, dýrustu laxá landsins. Og ég á að fljóta þar og veiða eldislax á morgun því að breski auðkýfingurinn er brjálaður. Þannig að ég verð hérna eitthvað fram eftir kvöldi.“

Eigandi pottsins spyr þá hvort hún ætli að vera í pottinum í allt kvöld.

„Heyrðu, ég er bara með þetta uppáskrifað frá Kristrúnu Frosta. Vertu ekki að æsa þig yfir þessu,“ svarar Ugla og fer aftur á kaf.

Myndbandið hefur vakið gríðarleg viðbrögð og því verið deilt mörg hundruð sinnum á Facebook en það má sjá í heild sinni hér að neðan: