Varar nýju stjörnuna í þungavigtinni við að mæta Usyk strax

Itauma sigraði hinn þrautreynda Dillian Whyte með rothöggi eftir tæpar tvær mínútur þegar þeir mættust í Ríad í Sádi-Arabíu á laugardaginn.

Itauma hefur unnið alla þrettán bardaga sína á atvinnumannaferlinum, þar af ellefu með rothöggi. Miklar væntingar eru gerðar til þessa tvítuga stráks en Hatton hvetur hann til að flýta sér hægt og vill alls ekki að hann mæti heimsmeistaranum Oleksandr Usyk strax.

„Þeir eru að tala um Usyk næst, vá, róum okkur aðeins niður. Usyk á aðeins nokkra bardaga eftir. Ef þú horfir á þungavigtarkappana sem eru að koma fram er leiðin greið fyrir Itauma,“ sagði Hatton.

Hann telur að best væri fyrir Itauma að mæta öðrum Breta næst og nefndi til dæmis Fabio Wardley og Frazer Clarke sem mögulega andstæðinga.

„Að berjast heima fyrir kveikir í stuðningsfólkinu. Stuðningurinn við hann er alltaf að aukast og það er það sem ég held að ég myndi gera. Bíddu aðeins með Usyk því hann á eftir að verða enn betri. Af hverju að berjast við hann núna? Bættu þig aðeins og berstu svo við hann,“ sagði Hatton sem snýr aftur í hringinn í desember þegar hann mætir Eisa Al Dah. Hatton verður 47 ára í október og hefur ekki barist síðan 2012, fyrir utan einn sýningabardaga fyrir þremur árum.