„Öll dýrin í skóginum voru vinir“

Tónlistarhátíðin sló algjörlega í gegn síðastliðinn laugardag enda seldust miðar upp á methraða og tilhlökkun tónlistargesta mikil.

„Þetta var bara algjör snilld og gekk vonum framar,“ segir Jökull í skýjunum eftir helgina. 

„Allir sem komu að þessu voru til fyrirmyndar, skipulagning, öll hjálp, gæslan og bara allir sem lögðu hönd á plóg við að láta þetta verða að veruleika. 

Þetta var auðvitað allt saman reist upp á örfáum dögum og ég er ómetanlega þakklátur öllum þeim sem komu að þessu og að sjálfsögðu listamönnunum sem komu fram.“

Hreiðar Hreiðarsson, aðalvarðstjóri hjá lögreglunni á Norðurlandi eystra, sagði í viðtali á Vísi um helgina með ólíkindum hvað tónleikahátíð Kaleo í Vaglaskógi gekk vel.

„Það voru bara allir í sameiningu mættir til að njóta og gleðjast saman. Eins og maður segir þá voru öll dýrin í skóginum vinir,“ segir Jökull glaður í bragði.

„Það verður líka að þakka öllum þeim sem mættu því það er nákvæmlega það sama upp á teninginn hjá þeim. Það var ekki neitt vesen sem við vitum af, allir voru saman í liði mættir til að njóta og eiga saman einhverja ótrúlega töfrandi stund.“