Fyrsta raf­knúna flug­vélin í dönsku innan­lands­flugi

„Stór dagur fyrir flugnörda. Stór dagur í flugsögunni,“ segir í fyrirsögn á vef danska ríkisútvarpsins DR þar sem sjá má stutt myndskeið af flugtakinu. Lengra myndskeið má sjá hér.

Flugvélin, sem nefnist Beta ALIA CX300, er bandarísk og smíðuð í Vermont. Hún er gerð fyrir einn flugmann og fimm farþega, með 400 kílómetra flugdrægi og flýgur á 280 kílómetra hraða á klukkustund.

Flugið í gær telst þó tilraunaflug en flogið var með frakt en án farþega. Það er liður í lengra reynsluflugi frá París til Stavanger í Noregi þar sem flugvélin mun gangast undir viðamiklar flugprófanir.

Sønderborg-flugvöllur vísar til þess í fréttatilkynningu að í nýársræðu þann 1. janúar 2022 hafi forsætisráðherrann Mette Frederiksen hvatt til þess að eigi síðar en á árinu 2025 yrði boðið upp á grænt kolefnislaust flug á innanlandsleiðum í Danmörku. Það hafi núna verið efnt.

„Sønderborg-flugvöllur varð fyrsti flugvöllurinn í Danmörku þar sem 100% rafknúin flugvél fór í reynsluflug á innanlandsleið,“ segir í tilkynningu flugvallarins. Þetta sé mikilvægt skref í átt að grænni flugferðum í Danmörku og Evrópu. Haft er eftir flugvallarstjóranum að það marki upphaf grænna orkuskipta í flugstarfsemi.

Flugsérfræðingur, sem danska ríkisútvarpið ræðir við, segir þetta fyrstu innsýn í framtíð flugsins á danskri grundu. Þetta sé þó ekki flugvél sem menn muni sjá fljúga til dæmis á áætlunarleiðum til Álaborgar. Þetta sé frumgerð sem þurfi að þróa og breyta í eitthvað meira. Það sé þó frábært að verða vitni að fyrstu smáskrefunum.