Golflandsliðið í öðru sæti eftir fyrsta hring

Mótið fer fram yfir fimm daga. Fyrstu tvo keppnisdagana er spilað í höggleik og þá síðari þrjá í holukeppni. Íslenska sveitin lék 36 holu höggleik í gær og gerir slíkt hið sama í dag. Í höggleiknum telja fimm af sex bestu skorunum og því þurfa allir að leggja sitt á vogarskálarnar þar sem aðeins skor hins slakasta hvern dag dettur út.

Gunnlaugur Árni Sveinsson og Veigar Heiðarsson léku best í íslensku sveitinni á fyrsta hring. Þeir voru hvor um sig á fimm höggum undir pari en Dagbjartur Sigurbjartsson var á fjórum undir pari. Auk þeirra skipa Böðvar Bragi Pálsson, Logi Sigurðsson og Tómas Eiríksson lið Íslands.

Íslenska liðið var alls á 14 undir pari og situr í öðru sæti mótsins. Lið Englands var efst á 20 undir pari, sex höggum á undan íslenska liðinu. Í þriðja sæti voru heimamenn frá Írlandi á ellefu undir pari.

Af liðunum sextán fara átta áfram í átta liða úrslit og stendur Ísland því vel að vígi eftir fyrsta daginn. Margt getur þó breyst á öðrum leikdeginum sem stendur yfir.

Hér má fylgjast með stöðu mála.