Paul Ince á­kærður fyrir ölvunar­akstur

Ince þarf að mæta fyrir dómara vegna málsins þann 18. júlí næstkomandi en hann var handtekinn á staðnum og í kjölfarið ákærður fyrir ölvun við akstur. Atvikið átti sér stað í grennd við Heswall golfvöllinn en Ince hafði fyrr um daginn birt myndir á Instagram frá vellinum svo að leiða má líkur að því að hann hafi fengið sér einn eða tvo í golfskálanum.

Ince, sem er 57 ára, var lykilmaður í liði Manchester United á árunum 1989-95 og spilaði 206 deildarleiki fyrir United. Hann fór síðan til Inter og þaðan til Liverpool en lauk ferlinum með Wolves ef frá eru taldir leikir teljandi á fingrum annarrar handar með Swindon og Macclesfield. Hann reyndi síðan fyrir sér sem knattspyrnustjóri, síðast sem stjóri Reading en hann var látinn taka pokann sinn í apríl 2023.