Ein­henta undrið ekki í NBA

„Fréttin“ um samning Emmanuel og Rockets virðist eiga uppruna sinn á Facebook síðu sem heitir Full Court og er með um 200 þúsund fylgjendur. Færslunni var deilt víða, meðal annars í Facebook hóp íslenskra NBA aðdáenda sem telur rúmlega 6000 meðlimi.

Því miður fyrir Emmanuel og aðdáendur hans þá virðist enginn fótur vera fyrir þessum stórtíðindum. Enginn stór fjölmiðill hefur staðfest þetta og Emmanuel er skráður án liðs og „undrafted“ á Wikipedia en hann hafði skráð sig í nýliðavalið í NBA í sumar.

Falsfréttir eins og þessi vekja upp allskonar spurningar um áreiðanleika upplýsinga á samfélagsmiðlum sem og fjölmiðlalæsi. Á Twitter má t.d. finna síðuna NBA Centel sem er í það minnsta kyrfilega merkt sem paródía. Það stoppar fólk þó ekki í að éta upp færslurnar, eins og þessa hér að neðan, sem hefur gefið af sér gullnámu af viðbrögðum frá brjáluðum NBA aðdáendum sem skilja ekkert í þessu vanþakklæti.