Ás­laug selur glæsiíbúð í Reykja­vík

Áslaug keypti eignina árið 2018 fyrir 71 milljón króna. Hún á einnig stærri eign í húsinu sem er 306 fermetra að stærð á tveimur hæðum. Þá eign keypti hún árið 2014 fyrir 90 milljónir.

Formfagrir gluggar og karakter

Umrædd íbúð er þriggja herbergja með tveimur svefnherbergjum, eldhúsi, stofu, borðstofu, sér þvottahúsi og baðherbergi. Úr stofunni er útgengt í sameiginlegan, fallegan garð, og fylgir leyfi til að reisa 12,8 fermetra garðskála.

Aðgengi að íbúðinni er um sérinngang sem liggur meðfram hægri hlið hússins. Í anddyri og gangi eru fataskápar, og þaðan er gengið beint í sér þvottahús.

Í miðju íbúðarinnar er stórt alrými með eldhúskrók og holi sem nýtist í dag sem vinnurými. Eldhúsið hefur verið endurnýjað með fallegum hvítum innréttingum og steingrárri borðplötu. Fyrir miðju er rúmgóð eyja.

Stofa og borðstofa er bjart og opið með gluggum á tvo vegu. Borðstofan er innst í rýminu í bogadregnu horni með stórum frönskum gluggum. 

Langur gangur tengir helstu íverurými íbúðarinnar. Svefnherbergin eru rúmgóð og samliggjandi, þar af er stærra herbergið með gluggum á tvo vegu. Á gólfum er gegnheilt reykt eikarparket, að undanskildum votrýmum.

Baðherbergið er endurnýjað með stórum gráum flísum á veggjum og gólfi.

Nánari upplýsingar á fasteignavef Vísis.