Ráðin nýr for­stöðumaður Gunnars­stofnunar á Skriðu­klaustri

Í tilkynningu segir að starfið hafi verið auglýst laust til umsóknar 24. apríl og lokið umsóknarfresti 23. maí. Sex umsóknir bárust og varð niðurstaða stjórnar Gunnarsstofnunar að bjóða Oddnýju Eir starfið.

„Oddný Eir Ævarsdóttir er fædd í Reykjavík árið 1972 og er menntuð í heimspeki og bókmenntum. Hún hefur starfað sem rithöfundur um langt skeið og gefið út á annan tug höfundarverka. Hún hefur fjölbreytta reynslu á mörgum sviðum menningar, mennta og miðlunar og hefur unnið við safnastarf, kennslu, ritstjórn, sýningastjórn og dagskrárgerð, svo nokkuð sé nefnt.

Oddný Eir var í stjórn Rithöfundasambands Íslands um tíma og sat þá um skeið í stjórn Gunnarsstofnunar fyrir hönd sambandsins. Hún tekur við starfinu 1. janúar 2026 af Skúla Birni Gunnarssyni sem hefur verið forstöðumaður Gunnarsstofnunar frá hausti 1999,“ segir í tilkynningunni.