For­seta­fram­bjóðandi skotinn í höfuðið

Miguel Uribe, 39 ára hægri-sinnaður kólumbískur forsetaframbjóðandi, varð fyrir árásinni á kosningafundi sem hann stóð fyrir í almenningsgarði í Bogotá á laugardag. Ljósmyndir af atvikinu sýna Uribe útataðan í blóði umkringdur fólki samkvæmt The Guardian. Að auki eru karl og kona slösuð eftir árásina

Talið er að árásarmaðurinn sé um fimmtán ára gamall unglingur og var hann handtekinn á vettvangi. Hann slasaðist einnig í árásinni og var farið með hann á sjúkrahús. Ekki liggur fyrir af hverju árásin var framin en lögregla telur að fleiri einstaklingar hafi tekið þátt í skipulagningu hennar.

Uribe var fluttur beint á sjúkrahús og fór í skurðaðgerð. María Claudia Tarazona, eiginkona Uribe, segir hann enn berjast fyrir lífi sínu.

„Ég vona að Miguel Uribe lifi af,“ sagði Gustavo Petro, forseti Kólumbíu, en Uribe hefur gagnrýnt ákvarðanir Petro harðlega.

„Það er það sem ég vil umfram allt,“ sagði Petro.