Þor­leifur keilari hvergi nærri af baki dottinn

KLÍ hefur í bréfi til lögmanns Þorleifs Jóns hins vegar aftekið að óeðlilega sé staðið að valinu.

„Samkvæmt upplýsingum frá yfirþjáfara landsliðanna horfði hann, auk þeirra sjónarmiða sem fram koma í afreksstefnu, til þess hversu mikið leikmenn væru búnir að spila undanfarið tímabil auk þess að leggja áherslu á að velja blöndu leikmanna sem gætu spilað vel og náð árangri saman. 

Í því sambandi er mikilvægt að hafa í huga að keppni á mótum eins og því sem um ræðir er ekki eingöngu einstaklingskeppni heldur liðakeppni og því mikilvægt að horft sé til sjónarmiða um góða liðsheild,“ segir meðal annars í bréfinu sem stílað er á Rósalind Guðmundsdóttur lögfræðing Þorleifs.

Vísir hefur sagt af grýttri vegferð Þorleifs, en hann fer mikinn og sakar sambandið um samansúrraða og djúpstæða spillingu; að þetta sé einkalúbbur útvalinna þrátt fyrir að þiggja opinbera styrki. Allt er þetta vegna þess að hann var ekki valinn í landslið öldunga þrátt fyrir að hafa sigra Íslandsmótið sem fram fór á dögunum.

Í úrslitaleik bar Þorleifur Jón sigurorð af Þórarni Má Þorbjarnarsyni sem er framkvæmda- og íþróttastjóri KLÍ. Orð Þórarins Más í samtali við Vísi þess efnis Þorleifur Örn hafi „álpast til að vinna þetta mót með frekar lágkúrulegum hætti,“ eru síst til þess fallin að stilla úfið geð keilumannsins knáa.

„Þetta eru 17 milljónir í fyrra úr afrekssjóði og frá ríki. Það þarf að drekka ansi mikið fyrir það,“ segir Þorleifur Jón í samtali við Vísi. Og vísar í ársreikning sambandsins.

Ætlar sér viku í að rita greinargerð til ÍSÍ

„Stjórn KLÍ vill í því samhengi árétta að KLÍ fær reglulega úthlutað úr Afrekssjóði ÍSÍ enda uppfyllir sambandið öll þau skilyrði sem sett eru í reglugerð um Afrekssjóð ÍSÍ,“ segir í áðurnefndu bréfi.

Þorleifur Jón var fyrir helgi vondaufur um að hann hefði erindi sem erfiði en hefur nú hert upp hugann, segist nú vera að skrifa greinargerð sem muni fara til ÍSÍ á næstu dögum. Hann segist ætla að vanda sig við þá vinnu og gefi sér viku til að skrúfa hana sama. 

„17 milljónir er kannski ekki mikill peningur ef allir fengu að vera með. En 17 milljónir er töluvert fyrir einkaklúbb.“

Valgerður Rún Benediktsdóttir, sem er nýkjörin formaður KLÍ, hefur sent fréttastofu tölvupóst þar sem hún vill vekja athygli á „frétt“ sem birtist á vef KLÍ. Þar segir að stjórnin vilji árétta að ásakanir Þorleifs Jóns eigi ekki við rök að styðjast.

„Hvorki framkvæmda- og íþróttastjóri sambandsins né stjórn KLÍ annast val á landsliðum heldur er sú ákvörðun í höndum landsliðsþjálfara eins og hefðbundið er við val í landslið Íslands í fjölmörgum íþróttagreinum.“

Landsliðsmenn þurfi að skapa góða liðsheild

Þá segir að í tilefni af umfjölluninni hafi stjórn tekið sérstaklega til skoðunar hvort að farið hefði verið eftir lögum, reglum og afreksstefnu KLÍ við valið. Niðurstaðan kemur ekki á óvart: Það er ekkert óeðlilegt við landsliðsvalið.

„Rétt er að taka fram að Íslandsmeistaratitill, hvort sem er í unglinga-, fullorðins- eða öldungaflokki, veitir samkvæmt reglum KLÍ aldrei sjálfkrafa þátttökurétt í landsliðum Íslands í keilu heldur eru fjölmargir þættir teknir til skoðunar.“

Í því sambandi er skoðað hvort keppni á mótum eins og því sem um ræðir er ekki eingöngu keppt í einstaklingskeppni heldur einnig tvímenningi og liðakeppni.

„Því er mikilvægt að við val keppenda í landslið sé horft til ýmissa sjónarmiða svo sem að skapa góða liðsheild, ástundun keppenda í mótum og æfingum undanfarna mánuði og að keppendur fylgi siðareglum KLÍ í hvívetna, rétt eins og á við um aðrar liðsíþróttir.“

• Bréf_keilusambandPDF166KB
  Sækja skjal