Golf

Heið­rún og Jóhannes unnu Hvaleyrarbikarinn í fyrsta sinn

Ágúst Orri Arnarson skrifar
Nýir Hvaleyrarbikarmeistarar voru krýndir í gær.
Nýir Hvaleyrarbikarmeistarar voru krýndir í gær. Keilir

Heiðrún Anna Hlynsdóttir úr Golfklúbbi Selfoss og Jóhannes Guðmundsson úr Golfklúbbi Reykjavíkur hömpuðu bæði Hvaleyrarbikarnum í fyrsta sinn í gær. Heiðrún vann afgerandi sigur í kvennaflokki en Jóhannes tryggði sigur í karlaflokki í bráðabana.

Heiðrún Anna lauk leik á þremur höggum yfir pari samtals. Lék hún hringina þrjá á 72, 74 og 70 höggum. Þegar uppi var staðið var sigurinn afgerandi en Elsa Maren Steinarsdóttir úr GR var fimm höggum á eftir. Fyrir lokahringinn munaði tveimur höggum á þeim í efstu tveimur sætunum en Heiðrún og Elsa höfðu þá slitið sig frá hópnum. Bronsverðlaunin hlaut Eva Kristinsdóttir en hún var fimmtán höggum á eftir Heiðrúnu.

Hvaleyrarvöllur í Hafnarfirði.keilir.is

Spennan var hins vegar mikil í karlaflokki því Jóhannes og Guðmundur Ágúst Kristjánsson úr GR voru jafnir eftir 54 holur og þurfti því bráðabana til að skera úr um úrslit. Þar hafði Jóhannes betur.

Jóhannes lék á 72, 68 og 73 höggum en Guðmundur Ágúst elti hann uppi á lokahringnum í gær með því að leika á 69 höggum. Hina hringina lék Guðmundur á 71 og 73 höggum.

Sigurður Bjarki Blumenstein úr GR var lengst af í baráttunni um bikarinn en fór illa út úr hinni erfiðu 16. holu og lauk leik í gær á 76 höggum. Veigar Heiðarsson úr Golfklúbbi Akureyrar náði bronsinu en hann lék á 73, 70 og 71 höggi.

Hvaleyrarbikararnir eru einkar glæsilegir.keilir.is

Hvaleyrarbikarinn er einn elsti verðlaunagripur sem keppt er um í golfíþróttinni á Íslandi. Bik­ar­inn er veg­leg­ur og frem­ur óvenju­leg­ur í út­liti. Var hann hannaður og sér­smíðaður í listagalle­rí í Jap­an á sín­um tíma. Mótið er haldið ár hvert, fyrr en vanalega þetta árið.

Keppt var á Hvaleyrarvelli í Hafnarfirði og mótið er eitt stigamótanna á mótaröð GSÍ.




Fleiri fréttir

Sjá meira


×