Fótbolti

Lið Loga fer illa af stað

Ágúst Orri Arnarson skrifar
Logi Tómasson er leikmaður Stromsgodset í Noregi en líklega á förum frá félaginu.
Logi Tómasson er leikmaður Stromsgodset í Noregi en líklega á förum frá félaginu.

Logi Tómasson og liðsfélagar hans í norska liðinu Stromsgodset hafa ekki farið vel af stað á tímabilinu. 0-3 tap á heimavelli varð niðurstaðan í dag gegn HamKam, sem Viðar Ari Jónsson og Brynjar Ingi Bjarnason leika með.

Brynjar spilaði allan leikinn í miðri vörn HamKam en Viðar kom inn af varamannabekknum á 67. mínútu í stöðunni 0-1. HamKam bætti tveimur mörkum við á næstu mínútum. 

Logi Tómasson kom svo inn af varamannabekk Stromsgodset, í vonlausri stöðu, á 82. mínútu.

Þetta var þriðja tap Stromsgodset í röð og sjöunda tapið í aðeins níu leikjum hingað til á tímabilinu. Liðið situr í fjórtánda sæti af sextán liðum deildarinnar, eftir að hafa endað í sjöunda sæti á síðasta tímabili.

Allt bendir þó til þess að Logi Tómasson verði seldur frá félaginu í sumar. Greint var frá því fyrr í mánuðinum að tyrkneska félagið Samsunspor myndi ganga frá kaupum þegar félagaskiptaglugginn opnar þann 1. júlí.

Norski boltinn

Mest lesið


Fleiri fréttir

Sjá meira


×

Mest lesið