Synir El Chapo sagðir hafa myndað afdrífaríkt banda­lag

Bandalagið gæti gert þeim kleift að ná tökum á Sinaloa-samtökunum á nýjan leik.

Bræðurnir Iván Archivaldo og Ovidio Guzmán leiða eina fylkingu innan Sinaloa-samtakanna og hafa þeir barist gegn fylgimönnum Ismael Zambada eða „El Mayo“, sem leiddir eru af Mayito Flaco, syni „El Mayo“.

Fylkingar þessar kallast „Los Chapitos“ og „Los Mayos“.

El Chapo og El Mayo komu báðir að því að stofna Sinaloa-samtökin á árum áður og tóku fulla stjórn á þeim í miklum átökum árið 2008. Samtökin eru mjög umsvifamikil og hafa staðið í mikilli fíkniefnasölu um allan heim um árabil.

Bæði El Chap og El Mayo sitja nú í fangelsi í Bandaríkjunum og hafa synir þeirra barist um yfirráð yfir samtökunum með blóðugum afleiðingum fyrir íbúa Mexíkó. Hundruð liggja í valnum eða hafa horfið.

Ofbeldið í Mexíkó er gífurlegt. Tveir borgarstjóraframbjóðendur ríkisstjórnarflokks Mexíkó voru til að mynda myrtir í Veracruz-ríki á dögunum. Þá voru ritari og ráðgjafi borgarstjóra Mexíkóborgar skotin til bana í dag.

Hófust með svikum

Átök þessara fylkinga Sinaloa-samtakanna hófust eftir að El Mayo var óvænt handtekinn síðasta sumar, eftir að þriðji sonur El Chapo plataði hann til Bandaríkjanna. 

Sjá einnig: Blóðug barátta um yfirráð yfir Sinaloa-samtökunum

Þessi blóðugu átök hafa kostað Sinaloa-samtökin verulega í fjármunum og mannafla, svo eitthvað sé nefnt.

Meðlimir annarra glæpasamtaka hafa reynt að nýta sér þessa stöðu. Þau samtök bera nafnið Cártel de Jalisco Nueca Generación eða CJNG. Þau samtök eru leidd af manni sem heitir Nemesio Oseguera Cervantes og er kallaður „El Mencho“.

Samtökin eru samkvæmt blaðamönnum í Mexíkó talin hafa aukið umsvif sín í norðurhluta Mexíkó frá því átökin innan Sinaloa-samtakanna hófust, samkvæmt hugveitunni ACLED. Nú eru Los Chapitos sagðir hafa mögulega gert bandalag við El Mencho og CJNG.

Fregnir hafa borist af því að staða Los Chapitos hafi versnað nokkuð á undanförnum mánuðum og þar á meðal vegna þess að nokkrir háttsettir meðlimir fylkingarinnar hafi verið handteknir. Synir El Chapo hafa bæði þurft að verjast Los Mayos og hafa mikið fyrir því að lenda ekki í fangelsi.

Sjá einnig: Staða Sinaloa slæm eftir blóðug átök

Iván sjálfur rétt komst hjá handtöku í Culiacán á í febrúar, með því að flýja gegnum göng. Faðir hans flúði að minnsta kosti tvisvar sinnum úr fangelsi í Mexíkó gegnum göng.

Þá hafa einnig borist fregnir af því að meðlimir Los Chapitos hafi gerst liðhlaupar og gengið til liðs við Los Mayos.

Hávær orðrómur um bandalag

El País sagði frá því í dag að orðrómur um bandalag Los Chapitos og CJNG hafi verið á kreiki um nokkuð skeið. Orðrómur þessi varð svo háværari um helgina þegar myndband af meintum glæpamönnum úr báðum samtökum fór í dreifingu.

Í myndbandinu er því haldið fram að Los Chapitos og CJNG hafi tekið höndum saman og nú sé eingöngu „hreinsun“ eftir.

Umsvif CJNG hafa samkvæmt áðurnefndri skýrslu DEA aukist mjög að undanförnu og eru þau starfrækt í fleiri en fjörutíu löndum heims. Áætlað er að þau starfi einnig í öllum fimmtíu ríkjum Bandaríkjanna og eru samtökin skilgreind meðal skæðustu ógna sem steðja að Bandaríkjunum, eins og Sinaloa-samtökin. Bæði samtökin hafa verið skilgreind sem hryðjuverkasamtök í Bandaríkjunum.

Þá segir í skýrslunni að reynist þær fregnir réttar að Los Chapitos og CJNG hafi tekið höndum saman geti það mögulega leitt til þess að bæði glæpasamtökin eflist til muna. Leggi undir sig meira svæði og verði öflugri í alla staði.

Það gæti haft gífurlegar afleiðingar á sviði glæpasamtaka í Mexíkó og á landið í heild. Það myndi einnig hafa áhrif á Bandaríkin með auknu flæði fíkniefna eins og fentanýls til norður og auknu flæði skotvopna til suðurs.

Óvissan og óreiðan er þó mikil í Mexíkó og þykir erfitt að segja til um framhaldið. Í frétt El País segir að ástandið minni mjög á átökin um yfirráð yfir Sinaloa-samtökunum árið 2008. Þegar El Chapo og El Mayo tóku höndum saman gegn Beltrán Leyva bræðrunum.