„Hvað eru menn búnir að láta fífla sig út í?“

„Ég vissi ekki alveg hvert ég ætlaði þegar Arnar Gunnlaugsson var ráðinn,“ segir Tómas Þór Þórðarson, einn af stuðningsmönnum Víkings sem höfðu enga trú á því að Arnar ætti eftir að reynast maðurinn sem myndi færa félaginu langbestu ár í sögu þess.

Tómas er einn viðmælendanna í þáttunum A&B sem fjalla um tvíburana Arnar og Bjarka Gunnlaugssyni og hafa verið sýndir á Stöð 2 Sport. Þættina má finna á Stöð 2+ en brot úr fjórða og síðasta þættinum má sjá hér að neðan.

Arnar var ráðinn aðalþjálfari Víkings haustið 2018, eftir að hafa verið aðstoðarmaður Loga Ólafssonar.

„Ég ætlaði ekki að trúa þessu,“ segir Tómas sem á þessum tíma var á kafi í íþróttafréttamennsku. „Að aðstoðarþjálfarinn sem að hafði ekkert gert sem þjálfari… Það hafði enginn talað um hann! Enginn talað um hann sem mögulegan þjálfara neins staðar. Þetta var svo Víkingslegt. Hann fékk fund, heillar menn upp úr skónum og ég hugsaði bara: Hvað eru menn búnir að láta fífla sig út í?“

„Fyrsti leikurinn markar auðvitað risastór spor á hans ferli,“ segir Tómas og vísar þar til 3-3 jafnteflisins við Val vorið 2019, þar sem Logi Tómasson skoraði til að mynda frægt mark eftir tvo klobba.

„Þarna mættum við með unga putta, uppalda stráka, með hetjulegan, skemmtilegan og hugrakkan fótbolta. Og endum með að gera jafntefli, 3-3, sem var bara 3-3 sigur fyrir okkur. Þetta var einn mesti stimpill sem hugsast gat. Hér er ég mættur, svona ætlum við að spila og hér er eitthvað gott að fara að gerast, þangað til annað kemur í ljós.“