Drottningin lögð inn vegna veikinda

Drottningin var sótt í þyrlu í bústað prinsins í Sikkilsdalen þar sem þau vörðu páskunum. Greint var frá innlögninni í tilkynningu frá norsku konungshöllinni seint í gær.

Drottningin fékk gangráð í janúar eftir að hafa upplifað gáttatif á meðan hún var á skíðum. Þremur vikum síðar sneri hún aftur til opinberra verka. Konungurinn fór í sams konar aðgerð í mars árið 2024.

Í frétt norska ríkisútvarpsins um málið kemur fram að gögn sýni að þyrlan hafi sótt hana um klukkan tíu í gærkvöldi og lent á spítalanum í Osló um klukkan ellefu. Þar kemur einnig fram að næsta embættisverk hennar sé planað á fimmtudag en þá á hún að heimsækja Spireverket sem er atvinnumiðstöð fyrir ungt fólk. Síðar sama dag á hún að vera viðstödd opnun á þjóðminjasafninu í Osló. Fram kemur í frétt NRK að óvíst sé um þátttöku Sonju í þessum viðburðum eða hver muni þá taka við af henni.

Krónprinsinn mun í dag ferðast til Póllands og er sú heimsókn samkvæmt áætlun. Prinsinn mun heimsækja bæði Gdansk og Varsjá þar sem hann mun hitta Andrzej Duda, forseta landsins, og Lech Walesa, fyrrverandi forseta og Nóbelsverðlaunahafa.

Sonja drottning verður 88 ára á þessu ári. Í frétt NRK er einnig minnst á að síðasta embættisverk drottningarinnar hafi verið að taka á móti forseta Íslands, Höllu Tómasdóttur.

Fréttin var uppfærð eftir að drottningin var útskrifuð af spítala. Uppfært klukkan 10:04 þann 22.4.2025.