Vildu hætta Ameríkuflugi en keyptu svo 757-þotuna

Þetta kemur fram í frásögn Leifs Magnússonar, þáverandi framkvæmdastjóra flugrekstrarsviðs Flugleiða, í þættinum Flugþjóðin á Stöð 2 þegar hann rekur aðdraganda þess að Boeing 757-þotan varð aðalfarkostur Icelandair.

Leifur segir að með ráðningu Sigurðar Helgasonar yngri sem forstjóra árið 1985 hafi umræða um flugvélakaup hafist fyrir alvöru. Stjórnin hafi þá ákveðið að gera endurnýjun flugflotans að forgangsverkefni. Efasemdir um framtíð Ameríkuflugsins hafi hins vegar leitt til þess að stjórnin samþykkti að fyrst skyldi eingöngu hugað að nýrri gerð fyrir Evrópuflugið.

„Þessvegna var fyrsta þotan sem var samþykkt og valin og keypt, það var 737-400. Sem út af fyrir sig hentaði mjög vel í Evrópuflugið,“ segir Leifur.

Þeim sjónarmiðum hafi síðan vaxið fylgi innan stjórnarinnar að kannski væri eitthvert vit í því að halda Ameríkufluginu áfram.

„Þá var mér falið að kíkja á þetta og finna hentugustu vélina. Það var eiginlega mjög fljótt þá sem augun beindust að 757,“ segir Leifur.

Það var svo haustið 1988 sem stjórn Flugleiða samþykkti að kaupa tvær Boeing 757 og að semja um kauprétt að þeirri þriðju. Fyrstu 757-þotuna fékk félagið afhenta í apríl 1990 og þá næstu mánuði síðar.

Í þættinum Flugþjóðin er fjallað um 757-þotuna en engin önnur farþegaþota hefur þjónað Íslendingum jafn lengi og hún. Hversvegna ráðamenn Flugleiða völdu þessa flugvélartegund má fræðast um í þessu tíu mínútna myndskeiði:

Í næsta þætti á þriðjudagskvöld, 1. apríl, verður fjallað um Airbus-þoturnar sem stefna í að verða burðarásinn í farþegaflugi til og frá Íslandi eftir að Icelandair valdi þær sem arftaka 757-vélanna.

Íslendingar höfðu áður kynnst Airbus-þotum í þjónustu Wow Air og Play. Íslandsflug varð þó fyrst íslenskra flugfélaga til að reka þotur frá evrópska flugvélaframleiðandanum.

Áskrifendur Stöðvar 2 og Stöðvar 2+ geta séð þættina um Flugþjóðina í streymisveitu Stöðvar 2 hvar og hvenær sem er.