Á annað hundrað látnir í Mjanmar

Min Aung Hlaing, yfirforingi mjanmarska hersins og leiðtogi herforingjastjórnar landsins segist gera ráð fyrir því að fjöldi látinna muni hækka og biðlaði til „hvaða lands sem er, hvaða stofnunar sem er“ að koma íbúum Mjanmar til aðstoðar. Herforingjastjórnin segir mikil þörf sé á blóði á þeim svæðum sem verst fóru úr skjálftunum og að óttast sé um að vegainnviðir hafi orðið fyrir þvílíkum skemmdum að erfitt verði að viðbragðsaðila að komast til þeirra.

Eins og fram kom hafa taílensk stjórnvöld staðfest að níu manns hafi látið í kjölfar þess að háhýsi í Bangkok hrundi. Þá er 81 leitað í rústunum. Einnig hefur verið tilkynnt um tjón í Kína.

Í Mjanmar greina staðarmiðlar frá því að fjöldi fólks væri látið í borginni Mandalay og í bæjunum Toungoo og Aungban. Hundruð slasaðra voru flutt á sjúkrahús í Naypyidaw, höfuðborg landsins, þar sem hlúð var að sárum þeirra utandyra vegna tjóns sem spítalabyggingin hafði orðið fyrir þegar skjálftarnir riðu yfir.

Umfang tjónsins í Mjanmar er enn óljóst en myndefni á samfélagsmiðlum bendir til þess að það sé töluvert. Viðbragðsaðili sem Guardian ræddi við í borginni Amarapura segist telja að fimmtungur allra bygginga í borginni hafi hrunið.