Gjammandi á­horf­andinn biður McIlroy af­sökunar

Á æfingahring fyrir Players meistaramótið á þriðjudaginn kallaði áhorfandi á McIlroy þegar hann sló kúluna út í vatn. Hann líkti því við klúður McIlroys á Masters mótinu 2011.

McIlroy gekk í kjölfarið í átt að áhorfandanum, tók síma hans og gekk í burtu. Áhorfandanum var svo vísað í burtu af vellinum en fékk símann sinn aftur.

Áhorfandinn, sem heitir Luke Potter og æfir golf hjá Texas háskólanum, hefur nú beðist afsökunar á því hvernig hann lét.

„Sjáðu til, ég gerði mistök og gengst við þeim. Ég biðst afsökunar. Meira þarf ekki að segja. Það var gott að læra af þessu,“ sagði Potter.

Þjálfari Potters hjá Texas háskólanum baðst jafnframt afsökunar og sagði að uppákomuna vandræðalega. Hann sagði að Potter hefði sent skriflega afsökunarbeiðni til McIlroys.

Norður-Írinn lék á fimm höggum undir pari á fyrsta hring Players meistaramótsins. Hann er einu höggi á eftir efstu mönnum.