Sýning sem breytir upplifun okkar á heiminum

Smáralind 20. febrúar 2025 10:38

Sýningin Sjónarspil stendur yfir í Smáralind til og með sunnudeginum 2. mars vilhelm

„Viðbrögðin hafa verið frábær! Sýningin kallar fram undrun, hlátur og oft umræðu um hvernig við skynjum veruleikann. Krakkar og fullorðnir hafa bæði gaman af því að prófa sig áfram og uppgötva hvernig litir, form og ljós geta breytt upplifun okkar á heiminum.“ segir Þórunn Birna Úlfarsdóttir, markaðsfulltrúi hjá Smáralind um sýninguna Sjónarspil sem sett hefur verið upp í verslunarmiðstöðinni.

Sýningin kemur frá Þýskalandi og ferðast milli landa undir slagorðinu „Science on Tour“ í þeim tilgangi að sem flestir fái tækifæri til að prófa og kynnast heillandi fyrirbærum úr heimi vísindanna. Hún er sérstaklega hönnuð fyrir verslunarmiðstöðvar og verður eingöngu í Smáralind hér á landi. Gestir fá að upplifa hvernig heilinn og skynfærin vinna saman og stundum blekkja okkur. Á sýningunni má meðal annars finna sjónhverfingar, skynvillur og þrautir sem ögra skynjun okkar á stærð, hreyfingu og rými.

„Við hjá Smáralind viljum skapa fjölbreytta afþreyingu fyrir gesti okkar og höfum í gegnum árin unnið með „Science on Tour“ til að koma með spennandi og grípandi vísindasýningar til landsins. Þetta er í tíunda skiptið sem Smáralind fær sýningu af þessu tagi, en þær eru alltaf nýjar og hver með sínu sniði.

Við teljum að áhugi barna og ungmenna á vísindum geti aukist til muna með því að leyfa þeim að sjá vísindi í lifandi samhengi og upplifa þau á eigin skinni. Þessi sýning er dæmi um hvernig vísindi geta verið spennandi, skemmtileg og oft á tíðum ótrúleg.

Þessi sýning dregur fram hversu ótrúlegur heilinn okkar er og hvernig hann túlkar mismunandi skynáreiti – oft á óvæntan hátt,“ segir Þórunn og tekur fram að sýningin sé frábært stopp fyrir alla fjölskylduna í vetrarfríí.

„Sýningin er skemmtileg fyrir alla aldurshópa en hentar sérstaklega fyrir börn frá 5 ára og upp úr. Það skemmtilega er þó að hún höfðar líka til eldri krakka og fullorðinna sem hafa gaman af vísindum, þrautum og sjónhverfingum. Sýningin stendur yfir til og með sunnudagsins 2. mars sem þýðir að hún smellpassar í vetrarfrí grunnskólanna, sem gerir hana að tilvalinni afþreyingu fyrir fjölskyldur sem vilja nýta fríið í eitthvað spennandi og öðruvísi,“ segir Þórunn.

Auðvelt er að flétta heimsókn á sýninguna við aðra afþreyingu í Smáralind. En þar er meðal annars að finna fjölda verslana, veitingastaða, bíó, Fótboltaland. Það er því auðvelt að gera sér góðan dag úr heimsókn í Smáralind í vetrarfríinu með vísindum, leik og ljúffengum veitingum í bland.

Sýningin Sjónarspil stendur yfir til og með sunnudeginum 2. mars og er staðsett á tveimur stöðum á 1. hæð Smáralindar, aðgengileg og opin öllum. Upplýsingaskilti um sýninguna eru bæði á íslensku og ensku.