Willum sagður ætla að bjóða sig fram til for­seta ÍSÍ

RÚV greinir frá því að Willum undirbúi framboð til forseta ÍSÍ. Lárus Blöndal hefur verið forseti ÍSÍ síðan 2013 en ekki liggur fyrir hvort hann sækist eftir endurkjöri. Næsta ársþing ÍSÍ fer fram 16.-17. maí næstkomandi.

Willum var heilbrigðisráðherra fyrir Framsóknarflokkinn 2021-24. Hann datt út af þingi í síðustu kosningum.

Willum, sem er 61 árs, er með sterk tengsl við íþróttahreyfinguna. Hann spilaði sjálfur fótbolta og handbolta og sneri sér svo að þjálfun.

Hann þjálfaði karlalið Þróttar, KR, Vals, Keflavíkur og Leiknis R. auk þess sem hann stýrði íslenska landsliðinu í futsal. Willum gerði KR að Íslandsmeisturum 2002 og 2003 og Val að Íslandsmeisturum 2007 og bikarmeisturum 2005.

Elstu synir Willums, þeir Willum Þór og Brynjólfur Andersen, spila sem atvinnumenn í fótbolta, með Birmingham City og Groningen.