Halda á­rásum á­fram þó vopna­hlé eigi að hafa tekið gildi

Uppfært 08:15: Leiðtogar Hamas og ísraelskir embættismenn segja fjölmiðlum ytra að listinn sé kominn í hendur Ísraela en það hefur ekki verið staðfest formlega af Ísraelum. Um er að ræða nöfn þriggja kvenna sem sleppa á seinna í dag.

Í staðinn áttu Ísraelar að sleppa töluverðum fjölda Palestínumanna úr ísraelskum fangelsum. Vopnahléið átti að taka gildi klukkan 6:30 að íslenskum tíma.

Daniel Hagari, áðurnefndur talsmaður, sagði í morgun að árásum myndi ekki linna fyrr en Hamas framfylgdi samkomulaginu og afhenti nöfn gíslanna.

Benjamín Netanjahú, forsætisráðherra, segir að vopnahléið hefjist ekki fyrr en listinn sé kominn í hendur Ísraelsmanna og gaf hann út sambærilega viðvörun í gærkvöldi.

Sjá einnig: Sam­þykktu vopna­hlé en fram­tíðin ó­ljós

Í frétt AP fréttaveitunnar er haft eftir leiðtogum Hamas að listinn hafi ekki verið afhentur vegna ótilgreindra vandræða en að samkomulaginu verði framfylgt. Þá hefur fréttaveitan eftir ísraelskum embættismanni að samningamenn hafi staðhæft að listinn verði afhentur og að gíslunum verði sleppt, þó óljóst sé hvenær það verði gert.

Fram hefur komið að samkvæmt þessu þriggja fasa samkomulagi myndu Hamas-liðar sleppa fjölda gísla í skiptum fyrir það að Ísraelar sleppi Palestínumönnum úr fangelsi. Í fyrsta fasanum eiga Hamas-liðar að sleppa 33 gíslum yfir sex vikna tímabil og Ísraelar eiga að sleppa fjölmörgum Palestínumönnum úr fangelsum og þar á meðal dæmda hryðjuverkamenn.

Ísraelskir hermenn eiga einnig að hörfa frá byggðum Gasastrandarinnar á þessu tímabili og flæði neyðaraðstoðar á að aukast til muna.

Stórar spurningar eru uppi um hvað gerist eftir þetta sex vikna tímabil en viðræður um það eiga að hefjast tveimur vikum eftir að vopnahléið tekur gildi. Verði 33 gíslum sleppt á næstu sex vikum er talið að um hundrað verði áfram í haldi Hamas og að þriðjungur þeirra sé látinn.

Átta sagðir hafa fallið í morgun

Heilbrigðisyfirvöld á Gasa, sem stýrt er af Hamas, segja átta hafa fallið í árásum Ísraela í morgun.

Herinn gaf út tilkynningu á áttunda tímanum í morgun þar sem fram kom að verið væri að gera loftárásir á Gasaströndinni og að frekari upplýsinga myndu liggja fyrir síðar.

Var það í kjölfar þess að myndefni frá Gasa, meðal annars frá Al-Jazeera, sýndi þungvopnaða Hamas-liða á ferðinni um svæðið á bílum.

Fréttin hefur verið uppfærð.