Frum­sýning á Vísi: Hálka lífsins með Ný­dönsk

Myndbandið er textaverk, sett saman af Villa Warén og byggir á myndum frá Real World hljóðverinu þar sem lagið var hljóritað fyrr í sumar rétt eins og önnur lög væntanlegrar breiðskrifu sem heitir Í raunheimum. Þar er einnig að finna lagið Fullkomið farartæki sem var vinsælasta lagið 2024 á bæði. Rás 2 og Bylgjunni.

Nýdönsk kynnir nýju breiðskífuna á útgáfutónleikum í Norðurljósum þann 30. janúar en búið er að bæta við aukatónleikum þar sem það seldist hratt upp á þá fyrri.

Hljómsveitina skipa þeir Björn Jörundur Friðbjörnsson, Daníel Ágúst Haraldsson, Jón Ólafsson, Stefán Hjörleifsson og Ólafur Hólm. Þeim til aðstoðar við gerð plötunnar var Guðmundur Pétursson. Katie May sá um upptökur og hljóðblöndun.

Snýst um þennan sem er alltaf að reyna að gera betur

Björn Jörundur og Daníel Ágúst mættu til Ívars Guðmundssonar útvarpsmanns á Bylgjunni í morgun þar sem lagið var frumflutt. Þar lýstu því þeir meðal annars hvernig var að taka plötuna upp í sumar í hljóðveri tónlistarmannsins og goðsagnarinnar Peter Gabriel. Þeir segja alla meðlimi sveitarinnar koma að öllum textum.

„Við köstum hugmyndum á milli, göngum um gólf, tölum upphátt og dæsum og hlæjum og sláum niður hugmyndir eða lyftum þeim upp,“ segir Björn Jörundur. „Þetta er rosa skemmtileg vinna, af því við höfum gert þetta svo lengi og þekkjumst svo vel og þá er þetta svo lítið mál. Þetta er eiginlega eins og að tala við sjálfan sig.“

Daníel Ágúst segir nýja lagið vera um mann sem virðist vera með allt niðrum sig. Hann berjist í bökkum og þá sérstaklega í einkalífinu. Þeir félagar segja sveitina stöðugt vera að leita að nýju yrkisefni og í þessu lagi tali þeir máli heimilisföðursins. Björn Jörundur segir það geta tekið á sig ýmsar kómískar hliðar.

„Þarna er ein birtingarmyndin. Þarna er svona gæi sem er alltaf að reyna að gera betur í sambandinu, reyna að standa sig en hann rennur alltaf á rassinn.“