For­seta­efni í Georgíu spilaði áður fyrir Manchester City

Georgíski draumurinn vann umdeildan sigur í þingkosningum 26. október en þeim hefur verið mótmælt af hörku og hefur flokkurinn verið sakaður um kosningasvindl. Stjórnarandstaðan hefur haldið því fram að Rússar hafi haft áhrif á niðurstöðurnar og sniðgengur nú þingið.

Salome Zourabichvili, fráfarandi forseti landsins, krefst ógildingar kosninganna og var ekki viðstödd setningu þingsins á mánudaginn frekar en þingmenn stjórnarandstöðunnar. Talið er að Kavelashvili komi til með að vinna stórsigur í forsetakosningunum framundan.

Mikheil Kavelashvili á sjálfur langan feril í knattspyrnu að baki sér og var meðal annars framherji í liði Manchester City um tíma. Hann lék einnig lengi í efstu deild svissnesks fótbolta. Hann var kjörinn á þing fyrir hönd Georgíska draumsins árið 2016. Hann hefur sakað Vesturlönd um að kynda undir skautun og öfgavæðingu í georgísku samfélagi.