Bætir smám saman í vind

Á vef Veðurstofunnar segir að það verði suðaustankaldi eða -strekkingur og dálitlar skúrir eða slydduél sunnan- og vestanlands seinna í dag, en annars hægara og yfirleitt léttskskýjað.

Hiti verður á bilinu eitt til tíu stig, hlýjast syðra.

Á vefnum segir að gera megi ráð fyrir vatnavöxtum í ám og lækjum sem renna niður gil, sérstaklega þar sem enn sé snjór til fjalla. Ekki sé hægt að útiloka grjóthrun og yfirborðshreyfingar í bröttum hlíðum þar sem jarðvegur sé víða vatnsmettaður.

„Bætir enn í vind í nótt og fer þá að rigna sunnan- og vestantil, allhvasst eða hvasst við suðurströndina í fyrramálið, en dregur heldur úr vindi seinnipartinn og hlýnar í veðri.

Á sunnudag kemur ný lægð úr suðri og gengur norður með austurströndinni. Snýst þá í allhvassa vestanátt með rigningu, en slyddu eða snjókomu til fjalla og kólnar heldur. Úrkomulítið verður þó á norðausturhluta landsins,“ segir í hugleiðingum veðurfræðings.

Veðurhorfur á landinu næstu daga

Á laugardag: Suðaustlæg átt, 8-15 m/s, hvassast syðast og rigning með köflum, en úrkomulítið fyrir norðan. Hiti víða 5 til 12 stig, hlýjast sunnantil.

Á sunnudag: Suðaustlæg átt, 8-13 m/s, en snýst í vestan 10-18 síðdegis, hvassast syðst. Víða rigning og slydda eða snjókoma til fjalla fyrir norðan, en þurrt að kalla eystra. Hiti 2 til 7 stig.

Á mánudag: Suðlæg átt, 8-15 m/s og rigning, en bjart með köflum á Morður- og Austurlandi. Hlýnar í veðri.

Á þriðjudag: Stíf sunnanátt með rigningu eða súld, en bjartviðri norðaustanlands og hlýtt í veðri.

Á miðvikudag: Vestlæg átt og dálitlar skúrir eða slydduél og kólnar í veðri.

Á fimmtudag: Útlit fyrir stífa suðvestanátt með úrkomu og svölu veðri, en þurrt að kalla fyrir austan.