Þrettán látist vegna Mar­burg-veiru og ekkert bólu­efni til

Þetta kemur fram í tilkynningu á vef Landlæknis. Marburg-veira hefur ekki greinst áður í Rúanda en hún hefur áður greinst í ýmsum Afríku-ríkjum, svo sem Angóla, Kenýu, Suður-Afríku og Úganda. 

„Marburg-veira er af ætt þráðveira (filovirus) eins og ebóla-veira en báðar veirur valda svokallaðri blæðandi veiruhitasótt. Ekkert bóluefni eða lyf er til gegn Marburg-veiru en dánartíðni af völdum sjúkdómsins er há. Heilbrigðisyfirvöld í Rúanda hafa gripið til ýmissa aðgerða,“ segir í tilkynningunni. 

Tekið er fram að veiran sé ekki bráðsmitandi og smitist með snertingu við líkamsvessa frá veikum einstakling. Áhætta fyrir almenning sem ferðast frá Evrópu til Rúanda er talin lág. Þeir sem fara þó þangað til að starfa í heilbrigðisþjónustu geta verið í meiri hættu sé viðeigandi sóttvörnum ekki beitt. 

„Þau sem hyggja á ferðalög til Rúanda eru beðin að kynna sér vel ástandið þar og fylgja ráðum þarlendra heilbrigðisyfirvalda. Þau sem koma frá Rúanda og fá sjúkdómseinkenni eftir komu heim (flensulík einkenni, háan hita, höfuð- og vöðvaverki, einkenni frá meltingarfærum) eru beðin að hafa samband við heilbrigðisþjónustu án tafar,“ segir í tilkynningunni.