Opna fyrstu umboðsstofuna í eigu leikara

„Hugmyndin var búin að vera að malla hjá okkur frekar lengi og svo fórum við að heyra í fleirum sem voru í sömu hugleiðingum, það var svo í febrúar eða mars á þessu ári sem við Arnmundur ákváðum að ýta boltanum af stað og láta þetta verða að veruleika,“ segir leikarinn Ellen Margrét Bæhrenz í skriflegu svari til Vísis. Hún stofnaði Northern Talent ásamt Arnmundi Ernst.

Fannst vanta í flóruna

„Umboðsstofur fyrir leikara og skemmtikrafta eru tiltölulega nýjar af nálinni hér á landi og okkur langaði til að bæta í flóruna og kynna nýja leið. Það eru alls konar leiðir til að gera þetta og mismunandi hlutir henta mismunandi fólki. Á meðan að sumir vilja umboðsmann sem sér alfarið um samninga- og launamál fyrir sína hönd vilja aðrir það ekki. Ég og Arnmundur höfum prófað bæði,“ skrifar Ellen.

„Við fundum að okkur finnst best að sjá sjálf um okkar mál en söknuðum annarra kosta sem fylgja því að tilheyra umboðsstofu. Hjá Northern Talent er enginn eiginlegur umboðssmaður heldur er stofan hugsuð sem co-collaborative félag þar sem félagsmenn taka á sig mismunandi hlutverk í þágu heildarinnar. Samningamál eru í höndum hvers og eins en ef til þess kemur þá getum við leitað til hvers annars og hjálpast að í krafti fjöldans.“

Stór nöfn þegar á skrá

Þegar eru stór nöfn á skrá hjá stofunni, þekktir leikarar eins og Jón Gnarr, Katla Margrét Þorgeirsdóttir og Ilmur Kristjánsdóttir svo nokkur séu nefnd. Ellen segir það hafa verið grunnforsendu þess að halda af stað í þetta ferðalag að ná að safna í fjölbreyttan og góðan hóp af leikurum.

„Við fundum strax að áhuginn var mikill og fólk strax tilbúið að slá til. Við gætum ekki verið ánægðari og stoltari af hópnum enda algjör eðaleintök; hæfileikaríkir leikarar og vandaðar manneskjur. Það skal líka tekið fram að þó við Arnmundur séum drifkrafturinn á bakvið þetta, þá er þetta umfram allt hópframtak og öll hafa lagt sitt af mörkum.“

Ellen segir vinnu stofunnar hafa farið vel af stað. Þau finni fyrir miklum áhuga og eru þau þegar komin í samstarf við virta umboðsstofu í Bretlandi. „Þau koma til með að taka fyrir okkur samninga við framleiðslur á erlendri grundu þegar viðkomandi leikari óskar eftir því. Það eitt og sér er gríðarlega verðmætt fyrir okkar starfsemi þar sem erlend verkefni eru yfirleitt á öðrum skala en hér heima og margt sem þarf að huga að í samningamálum þar sem þekkist ekki hér.“