Um sjö stiga frost mældist í Eyja­firði í nótt

Á vef Veðurstofunnar kemur fram að það hafi verið kalt í nótt og mest mældist 6,8 stiga frost á Torfum í Eyjafirði og Möðruvöllum í Hörgárdal og 6,5 stiga frost á Þingvöllum. Það hlýnar í sólinni í dag og hiti verður á bilinu 5 til 12 stig. Hlýjast verður á Suðurlandi.

„Í kvöld og nótt nálgast lægð úr suðri, það hvessir af austri sunnanlands og fer að rigna þar.

Lægðin fer norðaustur skammt fyrir sunnan land á morgun. Þá er spáð allhvassri norðaustanátt, en hvassviðri eða stormi á Suðausturlandi og syðst á landinu fram yfir hádegi. Rigning um mest allt land, en slydda í innsveitum norðaustanlands.

Á sunnudag er síðan útlit fyrir norðanátt með vætu og svölu veðri á Norður- og Austurlandi, en birtir upp sunnan- og vestanlands,“ segir í hugleiðingum veðurfræðings.

Veðurhorfur á landinu næstu daga

Á laugardag: Austan og norðaustan 10-18 m/s, en hvassara syðst á landinu fram yfir hádegi. Víða rigning og lengst af talsverð úrkoma á austanverðu landinu. Hiti 3 til 13 stig, svalast í innsveitum norðaustanlands.

Á sunnudag: Norðan og norðvestan 8-15. Rigning með köflum á Norður- og Austurlandi, en bjartviðri sunnan- og vestanlands. Hiti 3 til 12 stig, hlýjast á Suðausturlandi. Hægari vindur um kvöldið og úrkomuminna.

Á mánudag: Gengur í suðaustan 10-18 með rigningu, en lengst af þurrt norðaustanlands. Hlýnandi veður.

Á þriðjudag: Stíf sunnanátt með súld og rigningu, talsverð úrkoma á sunnanverðu landinu. Hiti 8 til 16 stig, hlýjast norðaustantil.

Á miðvikudag: Suðvestanátt með skúrum, en léttskýjað norðaustan- og austanlands. Hiti 6 til 13 stig, hlýjast á Austurlandi.

Á fimmtudag: Suðlæg átt með lítilsháttar vætu, en þurrt og bjart á Norður- og Austurlandi. Hiti 7 til 13 stig.