Heillaður af stráknum sem fór frá Chelsea til Liverpool

Ngumoha, sem er kantmaður, hefur æft með unglingaakademíu Chelsea en hefur nú fært sig norður og þakkaði Chelsea fyrir sig, í stuttri færslu á Instagram.

Ítalski blaðamaðurinn Fabrizio Romano segir Liverpool-menn telja sig hafa nælt í algjört ofurhæfileikabúnt sem ætlað sé stórt hlutverk í framtíðinni. Lagt hafi verið fram myndarlegt tilboð eftir að Rio yfirgaf Chelsea.

Einn af þeim sem komið hafa að þjálfun Rio er gamla Chelsea-goðsögnin John Terry sem er sannfærður um ágæti leikmannsins unga.

„Þessi strákur er og verður algjör topp, toppleikmaður,“ skrifaði Terry í svari við færslu Romano á Twitter.

Rio var valinn maður mótsins í október í fyrra eftir að U16-lið Chelsea varð Englandsmeistari. Hann var færður upp í U21-lið félagsins í byrjun þessa árs.

Rio mun til að byrja með æfa og spila með U18-liði Liverpool.