„Þú nærð ekki 20 lands­leikjum með Ís­landi bara út af nafninu Guð­john­sen“

Hann kemur frá þýska liðinu Hansa Rostock fyrir 200.000 evrur samkvæmt heimildum Vísis. Þar hefur hann verið í hálft ár en áður var Sveinn á mála hjá Elfsborg.

„Ef Sveinn hefði ekki farið til Þýskalands hefðum við aldrei fengið þetta tækifæri. Ég hef fylgst með Sveini í nokkur ár í Svíþjóð og veit hvað í honum býr. Hér fáum við klassíska níu sem lætur finna fyrir sér í teignum. Þú nærð ekki 20 landsleikjum með Íslandi bara út af nafninu Guðjohnsen, hann spilar því hann á það skilið og vonandi getum við hjálpað honum að verða enn betri,“ segir Hampus Andersen, yfirmaður íþróttamála hjá Sarpsborg 08.

Sveinn gerir samning við félagið til ársins 2028. Félagið hefur fylgt honum eftir lengi en setti sig í samband við hann fyrir rúmlega viku og gekk frá félagaskiptunum í dag.

„Það var óvænt en mjög ánægjulegt þegar ég heyrði að Sarpsborg hefði áhuga. Ég hef upplifað hæðir og lægðir á mínum ferli, reynslumikill þó ég sé enn ungur. Ég hlakka til að leggja mig allan fram fyrir félagið,“ segir Sveinn.

Hann verður áttundi Íslendingurinn til að spila fyrir Sarpsborg. Emil Pálsson, Orri Sigurður Ómarsson, Kristinn Jónsson, Ásgeir Börkur Ásgeirsson, Þórarinn Ingi Valdimarsson, Guðmundur Þórarinsson og Haraldur Björnsson gerðu það sömuleiðis.