Heim­þráin til staðar en lífið í New York al­gjört ævin­týri

Spennandi tækifæri sem þau gátu ekki neitað

Hildur Anissa býr úti með kærasta sínum Sebastian Loui.

„Kærastinn minn fékk spennandi vinnu tækifæri sem við gátum ekki sagt nei við,“ segir Hildur Anissa um flutningana vestanhafs. Hún er bæði í fjarnámi og fjarvinnu úti.

„Ég stunda meistaranám við Háskólann í Bifröst og er að læra þar Forystu og Stjórnun. Ásamt því er ég í fjarvinnu frá Kaupmannahöfn sem sölustjóri hjá Atelier CPH.“

Hún segir daglegt líf úti alls konar.

„Þar sem ég er nýflutt og er enn að aðlagast þessum nýja raunveruleika þá er ekki komin mikil rútína á okkur, en fyrstu vikurnar hafa aðallega farið í að koma okkur fyrir, skoða borgina og nýja hverfið okkar ásamt því að kynnast fólkinu hér. 

Annars sé ég fram á að ég vera mikið á kaffihúsum næstu mánuði að læra og vinna og svo nota frítímann í pílates, finna bestu vintage búðirnar og borða góðan mat.“

Opið og hjálpsamlegt samfélag

Það er margt sem stendur upp úr í stórborgarlífinu.

„Ég elska fjölbreytileikan hér, bæði í fólki, menningu, mat og tísku. Það er svo mikið líf alla daga vikunnar og alltaf eitthvað spennandi að gera eða skoða. Annars er fólkið hérna er búið að koma mér sérstaklega á óvart en það eru allir eru búnir að vera svo hjálpsamir og almennilegir. 

Mér finnst líka geggjað hvað fólk er duglegt að bjóða fólki sem það þekkir ekki með í sín plön, það hefur reynst mér og manni mínum afar vel.“

Getur verið krefjandi að byrja upp á nýtt

Aðspurð um krefjandi hliðar þess að búa úti segir Hildur Anissa:

„Að vera svona langt í burtu frá fjölskyldu og vinum er alltaf erfitt, sérstaklega núna þar sem margir í kringum mig eru farnir að eignast börn og tíminn með þeim er extra dýrmætur. 

Það getur líka verið mjög krefjandi að þurfa að byrja alveg upp á nýtt, að kynnast nýjum vinum, búa til nýja rútínu og venjast nýju umhverfi. Það krefst vissulega þess að maður stígi aðeins út fyrir þægindarammann.

Stefnan hjá okkur er að vera hérna í New York í eitt til tvö ár en við erum opin fyrir því að lengja það ef við komum okkur vel fyrir og líður vel hérna.“

Þroskandi ævintýri

Hildur Anissa flutti frá Íslandi fyrir rúmum fjórum árum.

„Ég bjó í fjögur ár í Kaupmannahöfn og er núna nýflutt til New York, búin að vera hér í einn mánuð. Ég mæli svo mikið með því að prófa að flytja til útlanda. Eins erfitt og það getur verið í byrjun, þá er þetta svo mikið ævintýri og maður þroskast svo mikið á því að stíga út úr búbblunni heima.“

Þrátt fyrir að njóta sín vel á nýjum slóðum getur heimþráin stundum gert vart við sig.

„Ó já, heimþráin er alltaf til staðar. En ég tel mig heppna að eiga svo góða vini og fjölskyldu sem ég sakna alla daga og ég er alltaf mjög spennt að fara heim, hvort sem það sé til Köben eða Íslands.“

Það er sannarlega fjölbreytt flóra af alls konar fólki í New York og hægt að lenda í ýmsu óvenjulegu og fyndnu úti. Hildur Anissa segist ekki enn hafa upplifað það en hún sé undirbúin fyrir það.

„Ég hef nú séð alls konar rugl á samfélagsmiðlum en ég hef enn ekki lent í neinu þannig. Eina sem ég hef lent í eru alveg hlægilegar spurningar um Ísland. Til dæmis hvort við keyrum á „venjulegum“ vegum eða „venjulegum“ bílum, hvort það sé Internet á ísland og svo framvegis.

Ég er hins vegar að undirbúa mig andlega fyrir það að lenda í og sjá alls konar steikta hluti þarna, það er víst partur af þessu,“ segir Hildur Anissa kímin að lokum.

Hildur er sömuleiðis dugleg að deila myndaseríum af lífinu úti á Instagram hjá sér samanborið við þessa: