„Vorum stað­ráðnar í að kvitta fyrir töpin fyrr í sumar“

„Við vorum alveg staðráðnar í að hefna fyrir töpin tvö á móti þeim fyrr í sumar og við mættum til leiks af fullum krafti í þennan leik. Við sköpuðum fullt af færum og spiluðum bara heilt yfir mjög vel,“ sagði Andrea Rut sem skoraði eitt, lagði upp annað og átti skot sem leidd til þess þriðja í 4-0 sigri Breiðabliks. 

Andrea Rut kom Blikum í 2-0 í upphafi seinni háfleiks og lagði svo upp mark Vigdísar Lilju Kristjánsdóttur sem kom Blikum þremur mörkum yfir skömmu síðar. Þá átti Andrea Rut skotið sem Katrín Ásbjörnsdóttur fylgdi eftir í fjórða marki Blika. Andrea Rut hefur nú skorað sjö mörk í þeim 16 leikjum sem hún hefur spilað í deildinni í sumar. 

„Við erum búnar að tapa tvisvar á móti þeim á þessu tímabili og við vorum ekki að fara að láta það gerast aftur. Mér fannst við vera betri alveg frá fyrstu mínútu til þeirrar síðustu og vinna sanngjarnan sigur,“ sagði sóknartengiliðurinn. 

„Við mætum þeim strax aftur í næsta leik og það er alltaf svolítið skrýtið að mæta sama liðinu í tveimur leikjum í röð. Við þurfum bara að mæta jafn sterkar inn í þann leik,“ sagði Andrea Rut en liðin leiða saman hesta sína í fyrsta leik úrslitakeppninnar þar sem sex efstu liðin mætast á komandi vikum. 

Breiðablik og Víkingur eigast við í fyrstu umferð í keppni liðanna í efri hlutanum á föstudaginn kemur á Kópavogsvelli.