United komst í úrslitaleik ensku bikarkeppninnar, annað árið í röð, eftir sigur á B-deildarliði Coventry City eftir vítaspyrnukeppni á sunnudaginn. United var 3-0 yfir þegar tuttugu mínútur voru eftir en missti forskotið niður. Coventry-menn héldu svo að þeir hefðu skorað sigurmark í uppbótartíma framlengingarinnar en það var dæmt af vegna afar tæprar rangstöðu.
„Ég veit ekki hvað tekur við hjá Ten Hag eftir þetta,“ sagði Sutton á BBC. „Þetta eru endalokin fyrir hann. Það er engin leið fyrir hann til baka úr þessu.“
Sutton setti spurningarmerki við skiptingarnar sem Ten Hag gerði í leiknum gegn Coventry en liðið missti tökin eftir að hinir ungu og efnilegu Alejandro Garnacho og Kobbie Mainoo voru teknir af velli.
„Eftir leikinn horfir fólk á skiptingarnar sem Ten Hag gerði. En meira að segja hann hefði ekki getað séð þetta fyrir. Þeir voru í bílstjórasætinu,“ sagði Sutton.
„Frammistaðan eftir sjötíu mínútur var lýsandi fyrir það hvernig United hefur spilað á tímabilinu. Þeir misstu tökin og náðu þeim ekki og það hefur verið vandamál allt tímabilið.“
United er í 7. sæti ensku úrvalsdeildarinnar og mætir botnliði Sheffield United annað kvöld.