„Frá nagla­lakki hjá ömmu í iðnaðar­mann í skítugum fötum“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Í hversdagsleikanum finnst mér skemmtilegast hvað hún brýtur upp einföldustu hluti og getur gert ákveðin móment fallegri. 

Í örlítið dýpri pælingum þá finnst mér það magnað hvað tískan hefur fylgt okkur og fylgir okkur hvert sem við förum, við erum umkringd tísku alla daga án þess að við föttum það. 

Hún er alltaf relevant. Tíska og fagurfræði er líka eitthvað sem gerir lífið miklu skemmtilegra.

Hver er uppáhalds flíkin þín og af hverju?

Það er alveg vonlaust fyrir mig að nefna eina flík. Það sem stendur mér nærri þessa stundina er frá verkefninu mínu MoM Laboratory. Patrik eða PBT fékk einmitt að njóta góðs af þeim á hlustendaverðlaununum nýverið.

Í því verkefni tók ég gömul og lúin jakkaföt og gaf þeim nýtt líf. En þetta breytist eins og veðrið. Það er þó rétt að nefna það að Maison Margiela hefur tekið sér fótfestu í kollinum á mér síðastliðin ár og allt sem ég á frá honum er uppáhalds alla daga og alla nætur, það virðist að allt sem hann gerir hreyfir mikið við mér.

Eyðirðu miklum tíma í að velja föt hverju sinni?

Já það er óhætt að segja það. Þetta á hug minn allan, hvort sem það eru föt á mig eða fólkið í kringum mig jafnvel. 

En ég passa samt að halda í þetta „gut feeling“, að leyfa þessu að gerast náttúrlega. Í ljósi sögunnar verða töfrarnir oftar en ekki til þegar ég er hvað minnst að pæla í lokaútkomunni.

Hvernig myndirðu lýsa stílnum þínum?

Mér hefur alltaf þótt frekar erfitt að ramma inn stílinn minn, hann á það til að vera út um allt. 

Mér finnst það ekki hjálpa mér að festast á ákveðnum stað, ég vil vera opinn fyrir því að brjóta hlutina upp og gera eitthvað alveg nýtt. 70’s, Punk, Minimalismi og Bohemian eru hugtök sem ég myndi styðja mig við þessa dagana til að lýsa stílnum mínum.

Hefur stíllinn þinn breyst mikið í gegnum tíðina og hvernig þá?

Hann hefur gert það, þá sérstaklega þegar kemur að því að brjóta upp þetta hefðbundna. Ég hef í gegnum tíðina verið nálægt línunni, í ljósi nærumhverfis míns og þeim félagslegu aðstæðum sem ég er í hverju sinni.

Það urðu ákveðin straumhvörf fyrir einhverjum árum síðan þegar mér tókst að losna við pressuna frá sjálfum mér að vera stanslaust í nýjustu flíkunum og fylgja nýjasta wave-inu til þess að passa í eitthvað fyrirfram gefið form, heldur valdeflast í því að fylgja sannfæringunni minni og standa með henni.

Nýturðu þess að klæða þig upp? 

Já ekki spurning, mér finnst fátt skemmtilegra í rauninni.

Hvaðan sækirðu innblástur í tískunni?

Hún kemur úr öllum áttum, frá allskonar fólki og hlutum. Getur verið frá naglalakki hjá ömmu minni yfir í iðnaðarmann í skítugum fötum. 

Svo er ég að fylgja fullt af frábærum listamönnum á samfélagsmiðlum með það fyrir augum að sækja mér innblástur.

Ertu með einhver boð og bönn þegar það kemur að klæðaburði?

Já ég er með eina meginreglu, að mér megi ekki líða illa í því sem ég klæðist. Á endanum snýst þetta allt um að líða vel í eigin skinni og jafnframt í því sem þú klæðist.

Hver er eftirminnilegasta flík sem þú hefur klæðst og af hverju?

Ég verð að minnast á mitt fyrsta outfit frá MoM Laboratory verkefninu mínu. Þá notaðist ég við borðdúk frá ömmu og frakka frá pabba. Á sinn fáránlega hátt varð til eitthvað geggjað móment þegar þetta allt small að lokum, sem mér þykir mjög svo vænt um. 

Ég var svo í Madrid á dögunum og rakst á notaðan leðurjakka og var líkt og hann væri gerður fyrir mig, ég fann það um leið og ég dró hann yfir axlirnar á mér að hann væri að koma með mér heim. 

Ég er á þeirri skoðun að allir eigi að upplifa það einu sinni á ævinni að klæða sig í jakka og finna hverja einustu húðfrumu og taug tengjast honum. Það er alltaf eitthvað svo magnað við það.

Býrðu yfir einhverju góðu ráði þegar það kemur að tísku?

Líkt og ég nefndi áðan þá er það að líða vel í því sem þú klæðist algjört lykilatriði. Gera það sem þér líður best með og ef þér líður eitthvað off þegar þú klæðir þig í eitthvað þá verður að teljast ólíklegt að það sé að fara að breytast og þú munt ekki ná að vera þú sjálfur. 

Taktu frekar nokkrar auka mínútur, hugsaðu um hvað þér finnst flott en ekki hvað öðrum finnst og láttu þetta smella.

Hér má fylgjast með Alexander á samfélagsmiðlinum Instagram.