Sú sænska tryggði Arsenal deildabikarinn

Úrslitin réðust ekki fyrr en í seinni hálfleik í framlengingu en sænska landsliðskonan Stina Blackstenius var hetja leiksins.

Draumur Chelsea um að vinna fjórfalt á síðasta tímabili sínu undir stjórn Emmu Hayes er því úti en það er nóg af bikurum eftir fyrir liðið að vinna.

Blackstenius skoraði eina markið á 116. mínútu eftir undirbúning frá Caitlin Foord.

Það setti þó sinn svip á fagnaðarlæti Arsenal að Frida Maanum hneig niður í uppbótatímanum. Líðan hennar er stöðug og hún er með meðvitund.

Þetta er annað árið í röð sem Arsenal vinnur Chelsea í úrslitaleik enska deildabikarsins en liðið vann 3-1 í fyrra. Þetta er í sjöunda sinn sem Arsenal vinnur þennan titil sem er það mesta í sögunni.

Mayra Ramirez hélt hún hefði komið Chelsea yfir á 22. mínútu leiksins en markið var dæmt af með hjálp myndbandsdómgæslu.

Ekkert mark var skorað í venjulegum leiktíma og ekki heldur í fyrri hálfleik í framlengingunni. Það leit hins vegar dagsins ljós þegar það voru fjórar mínútur í vítakeppni.

Hin kanadíska-íslenska Cloé Eyja Lacasse var í byrjunarliði Arsenal og spilaði fyrstu 72 mínútur leiksins.