Tvö mörk tekin af West Ham gegn Aston Villa

Aston Villa situr í 4. sæti deildarinnar með 56 stig, þremur stigum á undan Tottenham sem á leik til góða. West Ham er í 7. sætinu með 44 stig, þremur stigum á eftir Man Utd sem á leik til góða.  

West Ham komst yfir á 29. mínútu þegar Vladimír Coufal gaf boltann inn í teig á Michail Antonio sem kom á fljúgandi ferð og stangaði hann í netið.  

Antonio kom boltanum aftur í netið í upphafi seinni hálfleiks en markið var dæmt af eftir myndbandsskoðun vegna þess að Antonio handlék boltann áður en hann skaut honum í netið. 

Heimamenn féllu langt til baka í seinni hálfleik, vörðu forystuna og sóttu hratt í skyndisóknum. 

Aston Villa leitaði óðum að jöfnunarmarkinu og fann það loksins á 79. mínútu. Moussa Diaby gerði þar vel og kom boltanum fyrir markið á Nicoló Zaniolo sem kom honum í netið. 

Aukin harka færðist í leikinn í kjölfarið. Markaskorarinn Zaniolo og Edson Alvarez tókust á, ýttu hvor í annan og uppskáru báðir gult. Örskömmu síðar reif svo Douglas Luiz í Mohamed Kudus, sem svaraði með því að slá frá sér en hitti ekki, og báðir fengu gult spjald. Zaniolo var svo heppinn að vera ekki rekinn af velli í uppbótartíma þegar hann fleygði boltanum frá sér í pirringi. 

Tomas Soucek hélt að hann hefði tryggt sigurinn í uppbótartíma en aftur var mark dæmt af West Ham vegna þess að boltinn fór í hönd. Langan tíma og marga álitsgjafa þurfti til að skera úr um lögmæti marksins en eftir um sex mínútur sammældust dómarar um að markið ætti ekki að standa. Vonbrigðin leyndu sér ekki hjá David Moyes og lærisveinum hans.