Forstjóraskipti hjá Origo

Þetta kemur fram í tilkynningu frá fyrirtækinu. Þar segir að vegferð og skipulag samstæðu Origo hafi tekið umtalsverðum breytingum að undanförnu. Sem dæmi er nefnt að á síðasta ári hafi rekstur Origo á sviði notendalausna verið aðskilinn og færður í sjálfstætt dótturfélag sem ber heitið Origo lausnir.

„Þetta hafa verið lærdómsrík og góð fjögur ár með Origo. Löng saga Origo, þekking þess og sterk staða á markaði dró mig að þessu tækifæri fyrir fjórum árum. Ég var viss um að með auknum fókus og sjálfstæði eininga, væri hægt að skapa enn sterkari samstarfsaðila í upplýsingatækni. Til þess þurfti að ýta undir skýran fókus hjá hverju teymi, skapa framtíðarsýn á hverjum stað og setja aukna áherslu á rekstrarlega frammistöðu. Ég tel okkur komin á þann stað í þeirri árangursríku vegferð að það sé góður tími núna til að aðili með djúpa þekkingu og skarpa sýn taki við keflinu og þroski frekar þau hugbúnaðar- og tæknifyrirtæki sem mynda Origo. Ég mun halda áfram að styðja vegferðina í hlutverki stjórnarformanns Origo lausna, sem er nýstofnað sjálfstætt dótturfélag um þann þátt starfseminnar sem lítur að innflutningi og sölu á tölvu- og tæknibúnaði,“ er haft eftir Jóni, fráfarandi forstjóra.

„Það hefur verið frábært að starfa með Origo í hlutverki stjórnarmanns síðustu ár og ég hlakka til að koma enn þéttar að áframhaldandi sókn félagsins í hlutverki forstjóra.Síðustu ár hafa verið tími uppbyggingar og umbreytinga og því starfi er hvergi nærri lokið,“ segir Ari sem mun taka við keflinu af Jóni sem mun láta af störfum í lok aprílmánaðar.

Frá árinu 2010 hefur Ari gegnt starfi framkvæmdastjóra og stjórnarmanns hjá Reviva Capital S.A., sérhæfðu eignastýringar- og fjártæknifyrirtæki með höfuðstöðvar í Lúxemborg. Samhliða þessum störfum hefur Ari setið í stjórnum fjölmargra fyrirtækja á sviði fjármála og upplýsingatækni, þar á meðal eru Origo, Borgun, Íslandsbanki, Farsímagreiðslur, Median, Mentis og Fjölgreiðslumiðlun, auk fjölda fasteignafélaga og eignarhaldsfélaga í yfir 6 löndum.

Ari er menntaður tölvunarfræðingur og rafeindavirki og er með MBA frá Háskólanum í Reykjavík, auk þess að hafa lokið viðbótarnámi í stjórnun alþjóðlegra fyrirtækja (IDP) frá INSEAD viðskiptaháskólanum í Frakklandi.