Núnez bara einu skoti frá stöngin-út metinu

Ekki nóg með að Núnez hafi ekki hitt markið úr mörgum af þessum dauðafærum þá nálgast hann nú óðfluga metið yfir flest skot í stöngina og út. Það fylgir sögunni að farið var fyrst að taka þetta saman á 2009-10 tímabilinu.

Núnez hefur alls átt níu skot í markstangirnar eða markslána á þessu tímabili og er nú aðeins einu skoti á eftir methafanum. Metið á Hollendingurinn Robin van Persie.

Van Persie átti tíu skot í stöng eða slá á síðasta tímabili sínu með Arsenal veturinn 2011 til 2012. Hann varð engu að síður markakóngur ensku úrvalsdeildarinnar með 30 mörk í 38 leikjum.

Van Persie varð líka markakóngur árið eftir en þá sem leikmaður Manchester United. Þá átti hann „bara“ sjö stangarskot sem kemur honum samt sem áður inn á topp tíu á stöngin-út listanum frá því að farið var að taka þetta saman á 2009-10 tímabilinu.

Núnez er þegar búinn að jafna metið hjá Liverpool en landi hans Luis Suárez átti líka níu skot í stöng eða slá á 2013-14 tímabilinu þegar Suárez var markakóngur ensku úrvalsdeildarinnar með 31 mark í 33 leikjum. Það var hans síðasta tímabil á Anfield en hann gekk til liðs við Barcelona um sumarið.

Darwin Núnez hefur skorað í tveimur deildarleikjum í röð og alls fimm mörk í síðustu sjö deildarleikjum. Það hefur því gengið mun betur hjá honum fyrir framan markið í undanförnum leikjum en Úrúgvæinn skoraði ekki í átta deildarleikjum í röð frá byrjun nóvember þar til eftir jól.

Liverpool mætir Luton á Anfield í ensku úrvalsdeildinni í kvöld og þar er von á marki og kannski stangarskoti frá kappanum.