Tveggja milljóna evra virði af far­angri rænt af flug­vellinum á Tenerife

Rannsókn lögreglunnar á flugvallarstarfsmönnum hófst eftir að tilkynningum um þjófnað og verðmæti í óskilum fjölgaði gríðarlega. El Diario de Avisos, kanarískur fjölmiðill, greinir frá því að hópur starfsmanna hafi nýtt sér aðstöðu sína til að ræna töskum áður en þær bárust á farangursbeltið.

Þeir hafi opnað töskurnar þar sem þær lágu í farangursrými nýlentra flugvéla og látið greipar sópa um innihald þeirra. Að því loknu hafi þeir lokað töskunum á ný og komið þeim til skila á farangursbeltið til farþega.

Þar kemur einnig fram að hópurinn hafi starfað skipulega og að hver ræningi hafi haft sitt hlutverk í aðgerðunum. Einn hefur ákveðið hvaða flug skyldi ræna, annar sá um að fela ránsfenginn og enn annar um sölu á því sem stolið var í skartgripaverslum eyjunnar eða yfir internetið.

Samkvæmt spænsku lögreglunni fundust 29 nýju lúxusúr, 120 skartgripir, 22 farsímar, þrettán þúsund evrur í reiðufé og meira að segja farartæki sem keypt hafði verið fyrir ávinninginn.

Íslendingar hafa meðal annars orðið fyrir barðinu á farangursræningjunum.