Tiger Woods var bæði hissa og pirraður

Tilkynningin um að bandarísku, evrópsku og sádi-arabísku mótaraðirnar ætluðu í samflot var eins og sprengja í golfheiminum i júní.

Margir kylfingar höfðu talað harðlega gegn innkomu LIV mótaraðarinnar og á þeim tíma var kylfingum sem hoppuðu yfir til Sádanna bönnuð þátttaka á PGA mótum. Skyndilega var allt breytt.

Tiger er einn af þeim kylfingum sem hafði gagnrýnt LIV og hann var ósáttur þegar samflotið kom upp á yfirborðið.

„Ég var mjög hissa og ég held að margir kylfingar hafi verið það. Þetta gerðist mjög fljótt og án þess að einhverjar upplýsingar um slíkar viðræður kæmi fram. Það var erfitt að sætta sig við þetta. Svona má ekki gerast aftur,“ sagði Tiger Woods.

„Við vorum mjög pirraðir yfir því hvernig þetta fór fram og við höfum gert okkar til að sjá til þess að við verðum ekki skildir út undan í slíkum viðræðum í framtíðinni. Eitt af því er að koma mér í stjórn PGA,“ sagði Woods.

Hann býst við að gengið verði endanlega frá sameiningunni við LIV fyrir árslok.

Tiger er að snúa aftur eftir sjö mánaða fjarveru vegna meiðsla og er meðal keppenda á Hero World Challenge mótinu sem hefst á morgun.