Gamli Liverpool-maðurinn hættur hjá Montpellier eftir að hafa slegist við þjálfarann

Sakho og Michel Der Zakarian, þjálfara Montpellier, lenti saman á æfingu í síðustu viku. Sakho brást illa við og rauk af æfingunni þegar Der Zakarian dæmdi ekki aukaspyrnu fyrir hann á æfingunni. Þjálfarinn sagði við Sakho að hann réði því hvort og hvenær hann æfði og kallaði hann grenjuskjóðu. Þá fauk enn meira í Sakho sem greip í hálsmálið á Der Zakarian sem féll við.

Sakho hefur einnig verið sakaður um að hafa sparkað í Der Zakarian og hálsmen þjálfarans hafi brotnað í átökunum.

Leiðir hafa nú skilið hjá Sakho og Montpellier. Samkvæmt félaginu var allt gert í góðu en annar tónn er í yfirlýsingu sem Sakho sendi frá sér.

Þar hafnar hann allri ábyrgð á atvikinu og segist ekki eiga annan kost í stöðunni en að yfirgefa Montpellier.

„Þú verður vita hvenær þú átt að ganga frá borði þegar virðing er ekki lengur í boði,“ segir í yfirlýsingu Sakhos.

Montpellier fékk Sakho frá Crystal Palace fyrir tveimur árum. Hann lék áttatíu leiki fyrir Liverpool á árunum 2013-17. Sakho lék 29 leiki fyrir franska landsliðið á árunum 2010-18 og skoraði tvö mörk.